Traballadór EDTL halo instalasaun eletrisidade iha área Comoro, kinta (04/03). Imajen TATOLI/António Gonçalves

DILI, 03 setembru 2021 (TATOLI)-Tribunál Kámara Konta hahú analiza  proposta konkursu públiku hosi Eletricidade de Timor-Leste, Empreza Públika (EDTL, E.P) atu halo akizisaun iha tinan ne’e, ba kontadór pre-pagu hamutuk 100.000-resin ho kustu millaun $3-resin, hodi redús konesaun ilegál.

“Ita atu sosa kontadór pre-pagu foun hamutuk 100.020, nia prosesu agora iha ona Tribunál Kámara Konta hodi halo avaliasaun atu fó vistu préviu ka aprova avansa ba sosa kontadór, maibé kuandu la aprova ita tenke hahú fali prosesu hosi inísiu,” Prezidente Konsellu Administrasaun EDTL, E.P, Paulo da Siva, hateten ba Agência TATOLI, via telefónika, sesta ne’e.

Notísia relevante: EDTL, E.P prepara dokumentu deside modelu aprovizionamentu sosa kontadór pre-pagu

Tuir Dirijente ne’e, hafoin sosa kontadór pre-pagu eletrisidade, obrigatóriamente sei monta ba uma-kain ne’ebé seidauk iha no sira ne’ebé dada ahi ilegál.

Polítika Goveru maka atu labele halo diskriminasaun ba konsumidór sira no hasa’e reseita Estadu liuhosi sidadaun hotu sosa pre-pagu.

Tuir lista hosi EDTL,E.P, iha tinan 2019 hatudu uma-kain ne’ebé dada eletrisidade ilegál hamutuk 30.000 tanba laiha kontadór pre-pagu.

Kliente ne’ebé uza ona kontadór pre-pagu hamutuk 150.000, maibé ida iha ona instalasaun pre-pagu kontadór hamutuk 120.000 no 30.000 seidauk iha.

Bazeia ba lei númeru 33/2016, 16 agostu, ko’alia kona-ba tarifa EDTL inklui koima sira, katak kliente hotu bainhira uza enerjia eletrisidade tenke selu ka sosa pre-pagu.

Jornalista : Florencio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here