Lia-na’in sira hosi uma lisan Klaran Haemolin Nai Fatisin, Uma Lisan Sesu Rai Laduka Maneguim no Uma Lisan Babulu Matai hosi Dato Feto no Mane, hamutuk iha Uma Lisan Nikir Kalabu'uk lori fahi no manu la’o ba iha posu Mina-Matan Liu Rai ne’ebé lokaliza iha aldeia Sanfuk, Camanasa, Suai Vila, Covalima. Imajen Tatoli/Jogerjo Guterres.

COVALIMA, 12 outubru 2021 (TATOLI)—Lia-na’in hosi uma lisan Nikir Kalabu’uk no uma lisan Amanas hamutuk ho Autoridade Nasionàl Petróleu no Minerál (ANPM) realiza serimónia kultura hodi husu lisensa ba natureza no matak malirin molok Kompañia Timor Resources halo perfurasaun ba posu mina-matan Liu Rai. 

Notísia Relevante: ANPM garante perfurasaun mina-matan iha Suai laiha impaktu ambientál

Iha serimónia rituál ne’e uma lisan sira oho fahi no manu hodi husu matak malirin ba rai-lulik no ba bei’ala sira molok halo perfurasaun ba mina-matan identifikadu.

Dato feto sira prepara naan aten no naan isin atu fó han ba rai-lulik Covalima antes halo perfurasaun ba mina-matan. Imajen Tatoli/Jogerjo Guterres.

Molok Serimonia rituál ne’e hahú, lia-na’in sira hosi uma lisan Klaran Haemolin Nai Fatisin, Uma Lisan Sesu Rai Laduka Maneguim no Uma Lisan Babulu Matai hosi Dato Feto no Mane, hamutuk iha Uma Lisan Nikir Kalabu’uk lori fahi no manu ne’ebé akompañia hosi Prezidente ANPM, autoridade lokál no komunidade, la’o ba iha posu Mina-Matan Liu Rai ne’ebé lokaliza iha aldeia Sanfuk, suku Camanasa, postu administrativu Suai Vila, munisipiu Covalima.

Hafoin to’o iha posu mina matan liu Rai, lia-na’in sira hosi uma lisan Kalabu’uk hisik manu nia raan kahoor ho nu-been hodi hisik hanesan fó bensaun ba mina-matan no fó han Rai-Lulik no bei’ala sira ho naan nia aten hodi husu matak malirin. 

Lia-na’in Uma Lisan Nilir Kalabu’uk, Bei Lala Jorge Alves, iha nia hamulak husu ba bei’ala no rai-lulik Covalima atu fó matak malirin ba traballdór sira-ne’ebé serbisu iha fatin ida-ne’e no proteje ekipamentu sira-ne’ebé sei instala iha fatin ne’e molok hahú halo perfurasaun ba mina-matan.

“Ama tuan sia, bei tuan sia, rai Sorun Tolu Camanasa, hori uluk no hori wa’in kedas. Ohin loron, atan ami emar, ami harohan ba ama tuan no bei tuan sia, atu hatudu dadolin hatudu hanoin ba rai ida-ne’e, mina matan ida-ne’e, mina liu rai naran bo’ot sa, boot tebes, naran di’ak sa di’ak tebes,” Bei Lala Jorge Alves ko’alia ho rai-na’in ho lian dadolin.

Sermónia rituál ne’e realiza, atu husu husu matak malirin ba matebian, be’iala no rai-lulik atu tau matan ba traballadór sira-ne’ebé servisu iha fatin ida-ne’e, hodi fó isin-di’ak no tau matan hodi kuidadu ekipamentu (materiál) ne’ebé atu uza ba halo perfurasaun mina matan Liu Rai. 

Partisipa iha serimónia rituál ne’e mak Prezidente ANPM, IPG, Timor Gap, Administradór Munisípiu Covalima no Postu Suai Vila, PNTL, Veteranu, Dato feto no Dato Mane, lia-na’in uma lisan Nikir Kalabu’uk, uma lisan Klaran Haemolin nai Fatisin, uma Lisan Sesu Rai Laduka Maneguim no Uma Lisan Babulu Matai inklui komunidade Sanfuk.

Notísia Relevante: Instalasaun ekipamentu perfurasaun mina área prizaun Covalima atinje ona 95%

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here