Vise-Ministru Administrasaun Estatál (MAE) Lino de Jesus Torrezão, Diretór Jerál STAE Acilino Manuel Branco no Prezidente CNE José Belo, kinta ne’e (30/09) despede ekipa hosi CNE no STAE, nune’e aban (01 outubru) dezloka ba diáspora halo atualizasaun informasaun resensiamentu eleitorál no atualizasaun baze dadus. Imajen TATOLI/Evaristo Soares Martins.

DILI, 12 outubru 2021 (TATOLI)— Órgaun Administrasaun Eleitorál  hanesan Sekretáriu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés) no entidade relevante sira hasoru difikuldade halo resensiamentu eleitorál ba timoroan iha Korea do Súl, Portugál no Inglaterra.

“Ita nia ekipa resensiamentu eleitorál ba timoroan sira iha diáspora, hasoru difikuldade tanba atendimentu  la másimu,” Deputada hosi Bankada FRETILIN, Maria Angelica Rangel, hateten, iha sala plenáriu Parlamentu Nasionál, tersa ne’e.

Ekipa konjuta hamutuk 35, kompostu hosi STAE na’in-ualu, CNE na’in-ualu, ekipa hosi Ministériu Negosiu Estranjeiru no Kooperasaun liuhosi diresaun notariadu na’in-12. Hosi ema hirak-ne’e koloka ema na’in rua ba kada nasaun iha Portugál, Korea Súl no Inglaterra.

Objetivu órgaun administrasaun eleitorál rua ne’e iha diaspora atu halo resensiamentu eleitorál ba timor-oan sira atubele ezerse direitu iha festa demokrasia iha eleisaun prezidensiál 2022.

“Ita nia ekipa sira taka avizu iha Embaixada sira iha diaspora liuliu iha Reinu-Unidu hodi fó atendimentu kada loron ba ema 100 to’o 150, maibé realidade la hanesan ne’e tanba timoroan-sira tuir regra serbisu hodi buka moris,” reprezentante povu ne’e esplika.

Hatan ba kestaun ne’e, Ministru Asuntu Parlamentar no Komunikasaun Sosiál (MAPKomS), Francisco Martins Jerónimo, informa, parte Governu simu ona informasaun hosi ekipa-sira kona-ba difikuldade resensiamentu eleitorál iha diaspora.

“Ita nia funsionáriu sira ba ona iha diáspora, maibé loos duni sira iha difikuldade ida liuliu atu halo resensiamentu eleitorál ba timoroan kada loron 100 to’o 150, maibé la too tarjetu tanba okupadu ho serbisu  no enfrenta mós liña internet tanba kompañia tolu oferese iha ne’e ho kapasidade 200 Mbps, maibé ba iha diaspora presiza  kapasidade 500 Mbps,” Minstru Francisco esklarese.

Ho difikuldade ne’e, Governante ne’e, informa ekipa konjuta resensiamentu eleitorál halo ona mudansa kada loron fó atendimentu ba ema 20.

“Ami ko’alia ona ba sira atu haree situasaun ne’e, atubele fó solusaun iha tempu besik hodi halais resensiamentu eleitorál ba timoroan iha diáspora,” nia dehan.

Tuir planu no durasaun ba hala’o resensiamentu eleitorál iha diáspora ne’e la’o to’o fulan haat ho balun, hahú hosi setembru  to’o 15 janeiru 2022.

Notísia Relevante : Aban, ekipa STAE- CNE dezloka ba diáspora halo resensiamentu eleitorál

Jornalista: Hortencio Sanchez

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here