Vise-Ministru Administrasaun Estatál (MAE) Lino de Jesus Torrezão, Diretór Jerál STAE Acilino Manuel Branco no Prezidente CNE José Belo, kinta ne’e (30/09) despede ekipa hosi CNE no STAE, nune’e aban (01 outubru) dezloka ba diáspora halo atualizasaun informasaun resensiamentu eleitorál no atualizasaun baze dadus. Imajen TATOLI/Evaristo Soares Martins.

DILI, 30 setembru 2021 (TATOLI)–Órgaun administrasaun eleitorál hanessn Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés) no entidade relevante sira seluk, aban (sesta, 01/10) sei dezloka ba diáspora hanesan ba Korea do Súl, Portugál no Inglaterra hodi halo resensiamentu eleitorál ba timor-oan sira.

Notísia Relevante: 14 setembru, ekipa téknika resensiamentu eleitorál sei dezloka ba diaspora

Serimónia dezlokasaun ba ekipa atu halo atualizasaun informasaun resensiamentu eleitorál no atualizasaun baze dadus iha nasaun diáspora ne’e dirije hosi Vise-Ministru Administrasaun Estatál Lino de Jesus Torrezão, Diretór Jerál STAE Acilino Manuel Branco no Prezidente CNE José Belo.

Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten ekipa hosi órgaun administrasaun eleitorál rua ne’e seidauk bele dezloka ba Austrália tanba kestaun COVID-19 iha nasaun refere.

“Ohin, ita despede no aban ekipa hahú halo dezlokasaun ba Korea Súl, Portugál no Inglaterra, hodi hein koordenasaun tuir mai kona-bá dezlokasaun ba Austrália nian,” Acilino Manuel Branco informa ba jornalista sira, iha salaun enkontru STAE Nasionál, Caicoli, Dili, kinta ne’e.

Objetivu hosi dezlokasaun ba estranjeiru ne’e atu timor-oan sira-ne’ebé iha diaspora bele ezerse direitu iha festa demokrasia iha eleisaun prezidensiál 2022. Sidadaun iha rai-li’ur kompostu hosi sidadaun orijinál no dupla sidadania.

Acilino Manuel Branco fó-sai katak ekipa Hosi STAE nian na’in-ualu (8), CNE na’in-ualu (8), ekipa hosi MNEK liuhosi dirasaun notariadu na’in-12. Hosi ema hirak-ne’e sei koloka ema na’in-rua kada nasaun iha Portugál, Korea Súl no Inglaterra.

Sekretariadu Tékniku Administrasaun Eleitorál (STAE) nia funsaun atu halo formasaun ba iha tékniku sira-ne’ebé mak sei halo resensiamentu no instala sistema.

“Depois halo akompañamentu, kuandu sistema funsiona ho di’ak, STAE sei fila. Hosi MNEK nian ema na’in-12, ema na’in-tolu sei koloka kada nasaun. MNEK sei halo serbisu administrativu barak no hafoun sidadaun sira-nia dokumentu, aumenta tán ekipa balun hosi MNEK tán (la’ós dirasaun notariadu)” nia dehan.

Nune’e mós CNE sei koloka nia ema sira iha postu resensiadu sira hodi halo supervizaun ba prosesu resensiamentu eleitorál ne’e tomak.

“Tanba ne’e ekipa tomak sei dezloka ne’e kuaze 35 hanesan ne’e, inklui mós tékniku sira hosi MNEK nian, ne’ebé tempu tuir mai tanba prosesu ne’e la’o to’o iha fulan-janeiru 2022. Entaun tuir rezolusaun Governu nian katak atendimentu la’ós halo de’it iha embaixada no konsuladu maibé sei halo mós ba sidadaun sira-ne’ebé mak identifikadu timor-oan barak,” Diretór Jerál STAE ne’e hateten.

Notísia Relevante:  MNEK-STAE koordena malu prepara eleisaun iha diaspora

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here