DILI, 11 outubru 2021 (TATOLI)—Diretór Servisu Edukasaun Munisípiu Dili, Duarte Bragansa, hateten, tempu besik Ministériu Edukasaun Juventude no Deportu (MEJD) sei halo distribuisaun kaderneta eskolár hamutuk 16.000-resin ba estudante ensinu báziku terseiru siklu.
“Ohin ha’u simu ona informasaun hosi parte diresaun kuríkulu, katak produsaun kaderneta eskolár segunda faze ramata ona no ita sei simu iha tempu besik hodi halo distribuisaun ba eskola sira iha territóriu nasionál, tuir lista estudante ne’ebé iha,” Diretór informa ba Agência TATOLI, iha ninia knaar fatin, Comoro, segunda ne’e.
Notísia relevante: MEJD sei distribui tan kaderneta eskolár ba estudante sira iha outubru
Distribuisaun kaderneta eskolár faze daruak ba de’it estudante sira iha ensinu báziku terseiru siklu.
Tanba ne’e, bainhira estudante terseiru siklu sira hetan ona kaderneta eskolár maka MEJD sei kontinua prodús fali kaderneta eskolár ba estudante ensinu sekundáriu jerál no tékniku vokasionál sira iha territóriu nasionál.
Jornalista : Tomé Amado
Editora : Julia Chatarina
