Aula prezensiál iha Ensinu Báziku Canossa, hafoin MEJD fó sai sirkular hodi reativa fali aula prezensiál iha Dili, segunda (20/09). Imajen TATOLI/António Gonçalves

DILI, 04 outubru 2021 (TATOLI)–Ministériu Eduksaun Juventude no Desportu (MEJD) konsidera estudante iha territóriu nasionál barak seidauk hetan apoiu distribuisaun kaderneta eskolár.

Diretór Servisu Edukasaun munisípiu Bobonaro, Crispin Moniz, informa, estudante hamutuk 11.000 mak seidauk hetan distribuisaun kaderneta eskolár, ne’ebé mai hosi estudante nível ensinu báziku terseiru siklu hamutuk 7.000 no sekundáriu 4.000.

“Ami haruka ona proposta bá MEJD hodi husu tan kaderneta eskolár, tuir númeru estudante ne’ebé iha, maibé ami simu ona resposta katak produsaun kaderneta eskolár la’o hela, parese distribuisaun sei halo iha outubru nia-laran,” Diretór Servisu Edukasaun munisipál, hateten iha edifísiu MEJD, tersa ne’e.

Notísia relevante: MEJD Sei Distribui Tan Kaderneta Eskolár 300.000

Estudante ensinu báziku primeiru no segundu siklu hamutuk 17.000 iha munisípiu Bobonaro mak hetan ona kaderneta eskolár no falta de’it estudante nível ensinu báziku terseiru siklu no sekundáriu jerál tékniku vokasionál de’it maka seidauk hetan.

Nune’e mós, Diretór Servisu Edukasaun munisípiu Liquiçá, Zito António de Oliveira, informa, estudante hamutuk 1.000-resin iha Liquiçá mak to’o agora seidauk hetan apoiu kederneta eskolár.

“Ami haruka ona pedidu ba nasionál hodi husu tan kaderneta eskolár, maibé tuir informasaun sira sei prodús hela no iha tempu besik sei halo distribuisaun,” nia akresenta.

Tinan kotuk MEJD halo distribuisaun kaderneta eskolár hamutuk 3.000-resin, maibé la sufisiente, tanba ne’e Servisu Edukasaun Munisipál husu tan 1.000 ba nasionál atu kompleta metade estudante ne’ebé seidauk hetan kaderneta eskolár.

Nune’e mós, Koordenadór Unidade Kurríkulu Nasionál, Pedro Ribeiro Gonçalves, garante katak prosesu distribuisaun kaderneta eskolár sei akontese iha fulan-outubru tinan ne’e.

“Ita espera katak bele distribui kaderneta eskolár iha fulan ne’e, tanba ne’e ho esforsu mak bele prodús lais liután atu estudante hotu bele iha ona kaderneta,” nia akresenta.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here