Ró Berlin Nakroma atraka iha Portu Dili. Imajen TATOLI/António Gonçalves.

DILI, 11 outubru 2021 (TATOLI)--Autoridade Portuáriu Timor-Leste (APORTIL) deside empreza Timor Ocean sai manan-na’in hodi halo manutensaun ba Ró Berlin Nakroma.

“Ró ne’e avaria desde dezembru 2020, maibé to’o agora ita iha situasaun difisil tanba serka sanitária no hahú loke konkursu iha maiu, ho tipu International Competitive Bidding (ICB), ne’ebé ninia tempu ne’e fulan-tolu, ne’ebé iha tempu ne’e nia laran, ekipa avaliasaun haree prosesu no iha setembru deside empreza Timor Ocean mak manan hodi halo manutensaun ba Ró Berlin Nakroma,” Prezidente Konsellu Administrasaun APORTIL, Flávio Cardoso Neves, informa, ba Agência TATOLI, iha ninia knaar fatin, Portu Dili, segunda ne’e.

Notísia relevante: Situasaun COVID-19 difikulta manutensaun ró-ahi Berlin Nakroma no Success

Tuir Prezidente APORTIL, molok atu deside empreza ne’ebé mak sai vensedór, presiza prienxe rekezitu balun hosi Biro Klasifikasi Indonesia (BKI), ne’ebé hanesan empreza públika ne’ebé iha autoridade klasifika naviu merkante ho bandeira Indonézia.

“Normalmente kuandu Ró Berlin Nakroma atu ba halo manutensaun, BKI mak tenke halo inspesaun no fó rekomendasaun, ne’ebé hosi rekomendasaun maka bele loke konkursu, maibé foin lalais prosesu konkursu ne’e prienxe kritéria no ekipa BKI labele mai Timór tanba situasaun COVID-19,” nia akresenta.

Aleinde ne’e, iha ona empreza hodi halo manutensaun, maibé kondisaun ró tenke di’ak hodi viajen bá to’o Surabaya, Indonézia. Tanba ne’e, maka empreza halo esforsu hodi hadi’a tiha ida ne’ebé presiza hadi’a nune’e bele garante viajen bá to’o fatin destinasaun.

“Agora sira hahú hadi’a ona tanba ró ne’e ninia mákina mak a’at. Tanba ne’e, empreza tenta halo koodenasaun ho Diresaun Nasionál Transporte Marítima hodi deside ró ne’e ba halo manutensaun iha Indonézia durante viajen ho di’ak, ne’ebé bainhira atu hadi’a uluk buat balun a’at depende ba kapasidade empreza,” nia hatutan.

Orsamentu ba manutensaun hamutuk $500.000 no durasaun ba manutensaun presiza fulan-tolu, ne’ebé antes ne’e iha tempu loron 45.

Durante Ró Berlin Nakroma a’at, Governu kontinua selu tripulante hamutuk na’in-17 no timor-oan na’in-haat, ne’ebé kada fulan ho kustu hamutuk $40.000.

“Ne’e kontratu fixu ona, katak bainhira ró a’at mós sira tenke garante ró ne’e funsiona (moris) hela de’it, maski la halo operasaun, ho razaun ida atu garante ró lakan hela de’it, tanba ne’e maka sustenta hela kombustível, ne’ebé kada fulan tolu gasta mina tonelada 20.000, kuandu la hamoris ró bele mout,” nia esplika.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here