STVJ Comoro finaliza ona formasaun movel iha Covalima

DILI, 10 outubru 2021 (TATOLI)—Diretór Sentru Treinamentu Vokasionál Juventude (STVJ) Comoro, Norberto da Costa, informa sesta ne’e STVJ Comoro finaliza ona formasaun movel ba benefisiáriu na’in–30 iha munisípiu Covalima.

“Ami–nia formasaun movel ne’e ami hala’o durante loron lima, ne’ebé iha loron sesta (08/10) ne’e, ami–nia formasaun ne’e finaliza ona,” Norberto da Costa hateten ba Agência Tatoli, via telefónika, domingu ne’e.

Iha serimónia enseramentu ne’e, nia dehan, autoridade Lokál mak reprezenta Administradór munisípál nian mak hodi ensera formasaun ne’e.

Iha formasaun movel ne’e, benefisiáriu sira sente kontente tebes, tanba bele tulun sira hodi hasa’e sira–nia abilidade, liu-liu oinsá atu bele halo variasaun ba sira–nia menu no oinsá atu bele halo prosesamentu ba sira–nia ai–han lokál ne’ebé mak iha sira–nia fatin.

“Tanba, desde sira loke sira–nia negósiu, sira nunka hetan formasaun ho modelu ida-ne’e. Sira sente kontente tebe-tebes tanba bele aumenta sira–nia kapasidade, abilidade, hodi sira bele aprende tan buat foun, mezmu dala barak sira haree buat ne’e iha, maibé atu prodús ne’e mak sira laiha koñesimentu. Ho ida-ne’e, sira sente orgullu ho ami–nia prezensa,” nia dehan.

Maske formasaun movel finaliza ona, STVJ Comoro sei kontinua tun ba terrenu hodi halo monitorizasaun ba benefisiáriu na’in–30 nia atividade iha fulan novembru nia laran.

“Ami–nia monitorizasaun ida-ne’e, hodi follow up fila–fali saida mak sira aprende, sira sei kontinua halo ka lae. Iha prosesu follow up ne’e, ami sei hala’o durante loron lima nia laran, hahú hosi 22 to’o 26 novembru, tuir data ne’ebé mak ami trasa ona,” nia informa.

Notísia Relevante: STVJ Comoro halo formasaun movel ba benefisiáriu 30 iha Covalima

Jornalista : Nelia Fernandes

Editór       : Cancio Ximenes