Pasajeiru sira sa’e Ró Bintang Samudra 8 hodi bá Oé-cusse, hosi Portu Dili, kuarta (06/10). Imajen/AMTL

DILI, 08 outubru 2021 (TATOLI)–Asosiasaun Mariñeiru Timor-Leste (AMTL) preokupa ho kestaun seguransa bainhira Ró Bintang Samudra 8 tula pasajeiru liu kapasidade hosi portu Dili bá Oé-cusse no konsidera ró ne’e la viável tanba nu’udar ró sasán la’ós pasajeiru.

“Tuir ami-nia haree ba kestaun operasionál no tékniku, ró ne’e la viável atu tula pasajeiru  barak hanesan horiseik, tanba ita tula pasajeiru tenke bazeia ba ekipamentu salva vida nian, iha ró leten no tenke adekuandu ho númeru ne’ebé hanesan ho ema ne’ebé ita tula. Ema labele barak liu fali ekipamentu, tanba ne’e maka ami kestiona,” Prezidente AMTL, Cimplicio Ximenes informa ba Agência TATOLI, via telefónika, sesta ne’e.

Tuir asosiasaun ne’e, ró ho tipu landing craft (LTC) bele utiliza hodi tula sasán ka karga de’it, maibé karik tula pasajeiru tenke tuur iha kadeira no uza jakete salva, ne’ebé normalmente disponível iha ró leten, tanba deck karga ne’ebé iha hodi asegura sasán, laós akomoda fali pasajeiru.

Ami kestiona mós ita-nia seguransa vida iha tasi laran, tanba tuir loloos ró hanesan LCT Bintang Samudra 8 só bele tula sasán hodi ba área remota,” nia akresenta.

Tuir observasaun asosiasaun ne’e, iha kuarta (06/10) ró sai hosi Dili bá Oé-cusse tula pasajeiru pur-volta 140-resin, tronton 10, karreta Hilux 18 inklui motorizada ualu.

“Bainhira tula pasajeiru karik tenke hanesan Ró Success no Ró Berlin Nakroma, tanba tuur fatin ba ema iha, maibé uza ró hanesan ne’e, bainhira halai no akontese tasi boot ruma to’o ró ne’e nakdoko, karga bele monu tun ba ema-nia leten,” nia dehan.

Husu Governu aselera manutensaun Ró Berlin Nakroma

Ba kestaun ne’e, Prezidente AMTL, Cimplicio Ximenes,  husu Governu aselera manutensaun Ró Berlin Nakroma, nune’e bele fasilita di’ak liután viajen pasajeiru hosi Dili bá Oé-cusse no Ataúro.

“Ami-nia ezijénsia, Governu presiza aselera manutensaun Ró Nakroma, tenke hadi’a lalais ona, atubele fó asisténsia ba ita-nia komunidade. Se ita nafatin dehan ró ida agora ne’e, ami hanoin labele tanba liga ba ema-nia seguransa iha tasi laran,” nia hatutan.

Tuir Prezidente asosiasaun, kestaun halo viajen tula pasajeiru iha tasi-laran, ninia risku ne’e maka’as.

“Ita-nia Governu tenke haree hodi rezolve emediatu kestaun ne’e, labele husik asuntu ne’e nune’e nafatin, ami laiha kompeténsia atu interven serbisu Governu, maibé ami rekomenda de’it tenke halo manutensaun ba Ró Berlin Nakroma ne’ebé durante ne’e halo própriu operasaun hosi Dili bá Oé-cusse no Ataúro, nune’e bele fó esperansa ba pasajeiru sira,” nia subliña.

Aleinde ne’e, AMTL konsidera autoridade kompetente falta kontrola no lejizlasaun marítima mamar tebes, tanba ne’e asosiasaun husu atubele hadi’a kestaun hurak ne’e.

Antes ne’e, Ministru Transporte no Komunikasaun, José Agostinho da Silva, hateten, situasaun pandemia afeta tebes ba kondisaun atu lori Ró Belin Nakroma halo manutensaun iha Surabaya, Indonézia, ne’ebé manutensaun ikus iha juñu 2020 ho kustu $226.000 no to’o agora tempu ona halo manutensaun maibé seidauk bele realiza.       

Notísia relevante: Ró Nakroma seidauk halo manutensaun

Enkuantu, tuir International Convention for the Safety of Life at Sea (SOLAS), obrigatóriamente ró sira ne’ebé halo operasaun komersiál iha tasi-laran anuálmente tenke halo manutesaun hodi garante no asegura vida pasajeiru sira.

Governu antes ne’e aluga ona Ró Tranship II hodi asegura movimentu sasán no ema via marítima, ne’ebé ikus mai ró ne’e hamosu polémika to’o tama prosesu investigasaun hosi parte kompetente, nune’e fulan-rua atraka iha Portu Dili no konsege tula pasajeiru loron hira de’it, hafoin ró ne’e fila ona ba Indonézia, maibé prosesu legál la’o nafatin to’o agora.

Jornalista : Natalino Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here