Nakroma atraka iha realokasaun urjente terminal ró iha Portu Dili. Imajen Tatoli/Florêncio Miranda Ximenes

DILI, 27 janeiru 2021 (TATOLI)-Ministru Transporte no Komunikasaun, José Agostinho da Silva, hateten situasaun atuál afeta lori Ró  Nakroma halo manutesun iha Surabaya, Indonézia.

“Tuir loloos,  ita-nia ró bá tiha ona manutesaun iha fulan-juñu liubá, maibé situasaun pandemia COVID-19 afeta entaun seidauk bá to’o agora,” Ministru José Agostinho, hateten iha Pálasiu Governu, kuarta ne’e.

Tuir International Convention for the Safety of Life at Sea (SOLAS), obrigatóriamente ró sira ne’ebé halo operasaun komerisál iha tasi laran anuálmente tenke halo manutesaun hodi garante no asegura vida pasajeiru sira.

“Ita-nia situasaun reál ba Ró Berlin Nakroma ne’ebé durante ne’e fasilita hela movimentu transporte marítima bá Oé-cusse no Atauro, ninia kondisaun la permite atu halo viajen,” nia akresenta.

Governu liuhosi Konsellu Administrasaun Autoridade Portuáriu Timor-Leste (APORTIL) asina ona kontratu ho Kompañia Ben Santoso hodi lori Ró Nakroma halo manutesaun iha Surabaya, Indonézia.

Nune’e, Ministru José Agostinho, dehan daudaun ne’e APORTIL halo hela koordenasaun ho kompañia indoneziu ne’e atubele halo manutesaun, maibé presiza kumpre regra Organizasaun Mundiál Saúde (OMS) no Governu país rua ba prevensaun COVID-19.

“Ita-nia posizaun mak  halo manutensaun ró, ne’ebé ita hahú koordena ho kompania no fatin ne’ebé ita atu halo manutesaun hodi mantein kumpre regra no prosedimentu OMS no Ministériu Saúde tanba moras ne’e risku ba vida,” nia hatutan.

Maski nune’e, Governu deside atu Ró Success mak subtitui Ró Berlin Nakroma atu halo operasaun hodi fasilita viajen.

Ró Success iha tempu besik atu halo manutesaun, tanba ne’e APORTIL hahú loke diskusaun atu buka ró ida atu substitui hodi garante movimentu marítima.

Iha tinan kotuk, Ró Nakroma bá halo manutesaun iha Indonézia ho totál orsamentu $226.000.

VIII Governu Konstitusionál prioritiza ona atu konstrui fatin atubele fasilita bainhira atu halo manutesaun ró sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here