Komisáriu AA/Alfándega, José António Fátima Abílio. Imajen TATOLI/Jogerjo Guterres

DILI, 07 outubru 2021 (TATOLI)–Autoridade Aduaneira (AA)/Alfándega husu ba Governu liliu Ministériu Transporte no Komunikasaun (MTK) hodi halo revizaun ba Lei númeru 30/2011 kona-ba kondisaun no prosedimentu atu observa relativamente importasaun veíkulu.

“Lei ne’e tenke halo revizaun fali tanba la adekuadu ona ho situasaun atuál. Tanba ko’alia kona-ba transporte, entaun Ministériu Transporte no Komunikasaun mak tenke inisia, hafoin partilla ho parte Alfándega no komérsiu atubele fó pareser ruma,” Komisáriu AA, José António Fátima Abílio, hateten ba Agência TATOLI, iha ninia knaar fatin, Palásiu Governu, kinta ne’e.

Notísia relevante: Alfándega alerta karreta produsaun liu tinan lima labele importa

Tuir Autoridade Aduaneira, lei ne’e la apropriadu tanba hateten katak veíkulu ne’ebé ninia tinan produsaun liu ona tinan-lima, konta iha tinan-ne’e, labele importa ona mai Timór, maibé realidade iha implementasaun la akontese.

“Tuir loloos tinan-lima ne’e tenke redúz ona ba tinan-tolu,” nia akresenta.

Aleinde ne’e, AA observa buat balun hanesan uzu privadu, katak hatama veíkulu uza privadu, labele fa’an ona.

“Realidade akontese katak sosa tiha mai, uza privadu hafoin fa’an filafali no kontinua sosa filafali, ida-ne’e ladún di’ak. Tanba pedidu sosa karreta ba uzu privadu diretamente mai Alfándega de’it, kuandu atu uzu ba negósiu mak pedidu manda ba komérsiu hodi hetan aprovasaun,” nia akresenta.

Komisáriu Alfándega ne’e konsidera,veíkulu uzadu tenke observa no haree didi’ak tanba barak, ne’ebé presiza hadi’a fali lejizlasaun, nune’e redúz risku ba importasaun karreta.

“Iha tinan ne’e, Alfándega simu pedidu sosa karreta uzu privadu barak, maibé barak mós balun pedidu sosa ba negósiu, tanba pedidu ba negósiu ne’e ami observa katak sira balun partisipa tiha konkursu leilaun karreta iha li’ur, hanesan Austrália, tanba Austrália ne’e ninia karreta hetan asidente oituan sira deside ba halo leilaun, entaun timor-oan sira hatene no sira tuir leilaun ne’e, sira hatama mai Timór hodi fa’an tutan ho presu la hanesan ona, ida-ne’e maka tenke kontrola,” nia preokupa.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here