Diretór Jerál Autoridade Aduaneira (AA), José António Fátima Abílio. Imajen TATOLI/Egas Cristovão

DILI, 27 janeiru 2021 (TATOLI)–Diretór Jerál Autoridade Aduaneiru (AA)/Alfándega, José António Fátima Abílio hateten karreta sira ne’ebé produsaun liu ona tinan lima alfándega sei la autoriza atu importa mai Timor-Leste tanba lei la permite.

“Liuliu karreta sira ne’ebé mak ita dehan liman-daruak (segunda mão) dekretu lei 30/2011 iha-ne’ebá ne’e regula kona-ba importasaun. Karreta importasaun sira ne’ebé mak tama mai ne’e nia produsaun tenke menus hosi  tinan lima. Más, kuandu liuhusi tinan lima ne’e nia labele tama,” José António ba Agência Tatoli, iha Palásiu Governu, kuarta ne’e.

Tuir Diretór Jerál Alfándega ne’e katak iha kazu balun hanesan mosu iha tinan tolu liubá kuandu kompañia ida hatama karreta 17 mai Timor-Leste,  karreta sira ne’ebé nia hatama mai tinan produsaun liu tinan lima ona no parte alfándega halo inspesaun mak deteta ikus halo apreensaun ba karreta hirak refere.

“Ami halo apreensaun ba karreta sira-ne’e iha portu hosi kompañia Care Besta Prize. Ami avansa tuir prosedimentu alfándega ninian. Depois nia na’in ba kesar fali dehan alfándega hola parte, entaun prontu hein tribunál nia desizaun mak deside,” nia haktuir.

“Maibé kuandu prosesu iha alfándega ne’e mak seidauk loos, ne’e bá iha Diresaun Transporte Terrestre mós  sei haree lai nia prosesu,” José António akresenta.

Nia esklarese, karreta sira ne’ebé mak atu importa mai iha Timor-Leste kumpri faze balun. Ida, karreta ne’e mai atu halo negósiu,  ka mai atu  fa’an tutan filafali. Entaun emprezáriu ne’ebé importa karreta mai ne’e tenke iha lisensa pré-aprovasaun hosi Ministériu Komérsiu Indústria.

“Agora lisensa pré-aprovasaun ne’e komérsiu limite tempu fulan ida. Kuandu lisensa ne’e liu ona data limite entaun tenke ba husu filafali komérsiu para estende fali ho justifikasaun tanba saida mak atraza,” António haklaken.

Nia hatutan, faze segundu, kuandu karreta sira-ne’e importa ona mai, alfándega foti kompeténsia tuir dekretu lei númeru 30/2011 hodi halo inspesaun fízika ba karreta sira-ne’e hodi haree karreta sira-ne’e nia tinan produsaun liuhusi númeru ‘Vi’, hafoin ida-ne’e mak alfándega manda ba DNTT hodi monta xapa matríkula.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here