Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, segunda (06/10). Imajen TATOLI/Francisco Sony

DILI, 06 outubru 2021 (TATOLI)—Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, aprezenta Projetu Rezolusaun Governu, iha reuniaun Konsellu Ministru (KM), kona-ba planu asaun nasionál ba ema ho eefisiénsia tinan 2021 to’o 2030.

“Proposta ne’ebé aprovadu, ho objetivu prinsipál atu garante promosaun ba direitu ema ho defisiénsia iha períodu tinan 2021 to’o 2030,” Ministru Prezidénsia Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kuarta ne’e.

Notísia relevante: MSSI Konsulta Planu Asaun Nasionál ba Ema ho Defisiénsia

Tuir Portavóz Governu, ezekutivu hakarak garante promosaun ba direitu ema ho defisiénsia iha períodu tinan 2021 to’o 2030, tuir orientasaun sira ne’ebé define ona hosi polítika nasionál ba inkluzaun no promosaun direitu ema ho defisiénsia, ne’ebé aprova liuhosi Rezolusaun Governu númeru 14/2012, loron 09 maiu, liuhosi asaun lubun ida atu dezenvolve ho forma artikulada hosi entidade públika sira.

Antes ne’e, MSSI, Ministériu Transporte Komunikasaun (MTK), Ministériu Edukasaun Juventude no Desportu (SEJD), Ministériu Obras Públika (MOP) ho Ministériu Ensinu Superior, Siénsia no Kultura (MESSK) halo konsultasaun públiku ho Asosiasaun Defisiénsia Timor-Leste (ADTL) kona-ba ezbosu planu asaun nasionál.

Planu asaun ne’e ho objetivu Atu fó asisténsia no protesaun di’ak ba ema  ho defisiénsia iha Timor-Leste, maibé presiza kooperasaun no kolaborasaun servisu ida integradu ho liña ministeriál inklui  parseiru sira hotu  hodi implementa.

Polítika nasionál ba ema ho defisiénsia no inkluzaun importante atu tulun Governu hodi fó asisténsia no protesaun di’ak ba sidadaun sira bele atu iha asesu inkluziva iha área edukasaun, saúde, justisa, formasaun profisionál no empregu, transporte públiku, desportu no seluk tan.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here