DILI, 30 jullu 2019 (TATOLI)-Ministériu Solidariedade Sosiál no Inkluzaun (MSSI), Ministériu Transporte Komunikasaun (MTK), Ministériu Edukasaun Juventude no Desportu (SEJD), Ministériu Obras Públika (MOP) ho Ministériu Ensinu Superior, ohin, halo konsultasaun públiku ho Asosiasaun Defisiénsia Timor-Leste (ADTL) kona-ba ezbosu planu asaun nasionál ba ema ho defisiénsia periodu 2020-2024.
Notísia Relevante : Governu Konsidera Ejijénsia ADTL Kona-ba Ratifikasaun Konvensaun Direitu EHD
Ministra Solidariedade Sosiál no Inkluzaun, Armanda Berta dos Santos, hateten, planu asaun ne’e atu define prioridade oinsá bele fó asisténsia hanesan ba ema ho defisiénsia liuliu asesu iha edukasaun, saúde, justisa, formasaun profisionál no empregu no seluk tan.
“Objetivu hosi sorumutuk ne’e atu bele servisu hamutuk ho liña ministerial hodi haree no diskute saida mak presiza atu halo hodi armoniza ba ezbosu planu asaun nasionál ba ema ho defisiénsia sai hanesan matadalan ba implementasaun periodu 2020-2024 nian,” hatete Ministra Armanda Berta dos Santos, iha ninia diskursu durante sorumutuk ne’e iha edifísiu Ministériu Transporte Komunikasaun (MTK), Caicoli, Dili.
Atu fó asisténsia no protesaun di’ak ba ema ho defisiénsia iha Timor-Leste, Ministra Armanda Berta dos Santos esplika, la’ós kna’ar MSSI de’it, maibé presiza kooperasaun no kolaborasaun servisu ida integradu ho liña ministerial no mós parseiru sira hotu hodi implementa.
Tuir planu MSSI aprezenta ezbosu ne’e ba Konsellu Ministru hodi hetan apresiasaun hosi Primeiru-Ministru, Taur Matan Ruak no membru Governu sira hafoin ekipa tékniku finaliza diskusaun ne’e iha tempu besik.
Diretór Ezekutivu ADTL, Cesário da Silva, garante planu asaun nasionál ba ema ho defisiénsia ne’e sei reflete no kondís ho situasaun ema ho kondisaun defisiénsia iha rai laran.
Entretantu, MSSI maka trata planu asaun ne’e no hetan asisténsia téknika hosi Governu Australia liuhosi ninia Embaixada iha Timor-Leste.
Jornalista : Nelson de Sousa
Editór : Francisco Simões
