Vise-MEJD kontinua hala’o kampaña vasinasaun iha Suku Ogues, Munisípiu Covalima. Imajen Tatoli /Celestina Teles.

COVALIMA, 05 outubru 2021 (TATOLI)—Vise Ministru Edukasaun Juventude no Desportu, António Guterres, fó parabéns ba abitante suku Ogues, postu administrativu Maucatar, munisípiu Covalima tanba abitante besik 100% simu ona vasina.

“Ha’u lori Governu nia naran hato’o parabéns no apresiasaun boot ba xefe suku, inan-aman, joven no veteranu sira, to’o ikus mai Suku Ogues lidera Primeiru lugar iha postu administrativu Maucatar, munisípiu Covalima, tanba abitante maiória simu ona vasina,” António Guterres hateten ba jornalista sira iha Suku Ogues, postu administrativu Maucatar, tersa ne’e. 

Nia hateten, abitante sira la’ós rona de’it orientasaun hosi xefe suku maibè abitante sira mòs sente vasina importante ba sira-nia saúde, tanba sira-nia ho sira-nia konxiénsia mak halo suku ida-ne’e sai forsa di’ak liután. 

Governante ne’e mós husu ba abitante sira-ne’ebé vasina ona atu fahe tutan informasaun ba sira-ne’ebé seidauk simuu vasina, nune’e enkoraza sira atu hakbesik-an ba sentru no postu saúde hodi simu vasina. 

“Vasina di’ak ba ita-nia saúde. Ita-nia saúde di’ak ona, ita hakarak ema seluk mós saúde di’ak. Inan-aman sira Abitante sira bainhira foin vasina doze dahuluk, tenke kontinua simu vasina nafatin ba doze daruak nian. Ha’u fiar, semana ne’e suku Ogues bele finaliza ona, tanba abitante sira iha konxiensia no iha kolaborasaun hodi fò apoiu ba Governu nia polítika kona-bá vasinasaun ne’e,” nia dehan. 

Xefi Suku Ogues, Faustino Cardoso, informa dadus abitante suku Ogues hamutuk 3.104 kompostu hosi mane 1.540 no feto 1.564 no hosi abitante sira iha suku Ogues ne’e, alvu atu simu vasina ne’e hamutuk 1.225. 

Abitante hirak ne’e mós antuziasmu simu vasina tanba vasina hanesan meu ida luta kontra COVID-19, nune’e iha suku Ogues ne’e liu ona trajetu tanba abitante sira maioria simu ona vasina.

“Abitante suku ne’e, simu vasina doze dahuluk hamutuk 1.519, doze daruak hamuutuk 747. Ho nùmeru ne’e, ha’u espera iha semana ne’e, abitante sira-ne’ebé simu vasina doze daruak belé atinje ona100%,” nia dehan.

Antes ne’e, Diretòr Servisu Saúde Munisípiu Covalima, Filipe Lemos, informa abitante sira iha munisípiu Covalima ne’ebé simu vasina atinje ona 70,9%.

Hosi 70,9% ne’e, abitante iha postu administrativu Fatumea ne’ebé simu vasina atinje ona 96,2%, Fatululik 93,5%, Tilomar 83,6 %, Fohorem 78,3%, Maucatar 73,1%, Suai Vila 67,5 no partisipasaun abitante vasina ki’ik liu mak postu administrativu zumalai ne’ebé foin atinje 55,8%. 

Vise-Ministru Edukasaun Juventude no Desportu nia prezensa iha Covalima hala’o kampaña vasinasaun iha postu administrativu Fohorem hanesan iha suku Laktos, Dato Tolu, Dato Rua no Suku Fohorem Vila, postu administrativu Maucatar iha suku Belekasak, Matai, Holpilat no  Ogues. 

Notísia Relevante: Abitante Covalima 70,9% simu ona vasina

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here