Ministru Finansa, Rui Augusto Gomes, reprezenta Governu Timor-Leste no Reprezentante Banku Dezenvolvimentu Aziátiku, Sunil Mitra, troka nota akordu empréstimu finansiamentu dezenvolve Aeroportu Internasionál Prezidente Nicolau Lobatu, iha auditorium Ministériu Finansa, Aitarak-laran, sesta (01/10). Imajen TATOLI/Egas Cristóvão

DILI, 01 outubru 2021 (TATOLI)—Ministru Finansa, Rui Augusto Gomes, reprezenta Governu Timor-Leste no Reprezentante Banku Dezenvolvimentu Aziátiku (ADB, sigla inglés), Sunil Mitra, sesta ne’e, asina akordu empréstimu ho montante millaun $135 hodi dezenvolve Aeroportu Internasionál Prezidente Nicolau Lobato, Comoro.

Tuir Ministru Rui Augusto Gomes, melloramentu konetividade aéreu, nesesáriu tebes ba dezenvolvimentu turizmu no hanesan motór importante ba kreximentu ekonómiku.

Ministru Finansa, Rui Augusto Gomes. Imajen TATOLI/Egas Cristóvão

“Tanba ne’e, fasilidade no seguransa aeroportu ne’ebé di’ak sei fasilita troka sasán, servisu, koñesimentu no idea liuhosi ligasaun ho sidade boot sira iha aziátiku. Timor-Leste presiza asesu ne’ebé di’ak ba kapitál internasionál, rekursu umanu no investimentu, inklui mellora konetividade aéreu potensialmente sei fó efeitu transformativu ba ekonomia,” governante ne’e hateten liuhosi intervensaun iha ámbitu seremónia asina akordu auditorium Ministériu Finansa, Aitarak-laran, sesta ne’e.

Nune’e, orsamentu empréstimu ne’e sei finansia projetu estensaun pista atterajen, konstrusaun torre-kontrolu tráfiku aéreu no reabilitasaun fasilidade sira seluk iha aeroportu.

Vise-Ministru Negósiu Estranjeiru no Kooperasaun, Julião da Silva no Embaixadór Japaun iha Timor-Leste, Masami Kinefuchi, asina no troka nota fundu doasaun ba finansiamentu projetu Aeroportu Internasionál Prezidente Nicolau Lobato, Comoro, iha auditoriu Ministériu Finansa, Aitark-laran, segunda (01/10). Imajen TATOLI/Egas Cristóvão

Hosi parte Governu Timor-Leste, sei aloka orsamentu millaun $300 hodi finansia obra konstrusaun sivíl, akizasaun rai, kompensasaun ai-horis no kustu seluk relasiona ho reasentamentu família sira ne’ebé mak hela besik iha aeroportu.

Iha biban hanesan, Vise-Ministru Negósiu Estranjeiru no Kooperasaun, Julião da Silva no Embaixadór Japaun iha Timor-Leste, Masami Kinefuchi, asina no troka nota fundu doasaun millaun $44, ne’ebé sei uza ba konstrusaun terminál pasajeiru foun no estasaun fornesimentu enerjia dedikadu ba aeroportu.

Notísia relevante: Aeroportu internasionál Comoro sei iha terminál pasajeiru ho metru 11.653

Governu konsidera ho projetu ne’e Timor-Leste sei bele kumpre padraun seguransa, garantia transportasaun aéreu ne’ebé seguru no efisiente, mellora konetividade aéreu ho país viziñu iha Ázia no Pasífiku, promove turizmu no setór ekonómiku sira seluk hodi ajuda Timor-Leste diversifika ninia ekonomia inklui kontribui ba país nia adesaun ba Asosiasaun País Sudeste Aziátiku (ASEAN, sigla inglés).

Governu Timor-Leste no banco desenvolvimentu asiatico (ADB) hasai fot hamutuk iha cerimonia assinatura troka notas fundu doasaun. iha salaun Ministériu Finansa, Aitarak-laran, sesta (01/10). Imajen TATOLI/Egas Cristóvão

Antes ne’e, Governu kria ona Komisaun interministeriál, ne’ebé kompostu hosi Ministériu Planu no Ordenamentu, Ministériu Transporte no Komunikasaun, Ministériu Obra Públika, Ministériu Negósiu Estranjeiru no Kooperasaun no Ministériu Finansa, ne’ebé hetan apoiu tékniku hosi ADB, Governu Japaun, Austrália no International Finance Corporation (IFC).

Iha fatin hanesan, Diretór Jerál Departamentu Rejionál Sudeste Aziátiku ADB, Ramesh Subramaniam, hateten, projetu ne’e akontese iha tempu ne’ebé própriu, maibé situasaun pandemia perturba ona konetividade aéreu.

“Tanba ne’e, hatudu importánsia atu mellora konetividade aéreu ba rekuperasaun ekonómiku, iha rejiaun no país sira hanesan Timor-Leste, ne’ebé hetan kreximentu ekonómiku kiik tebes iha tinan kotuk no hatudu deklina 90% iha ninia konetivade aéreu,” nia nota.

Embaixadór Japaun iha Timor-Leste, Masami Kinefuchi. Imajen TATOLI/Egas Cristóvão

Nune’e mós, Embaixadór Japaun ba Timor-Leste, Masami Kinefuchi, dehan, iha tinan 20 ikus, hanesan períodu rekonstrusaun hafoin Timor-Leste restaura nia Independénsia, tanba ne’e fiar katak Timor-Leste sei transforma iha tinan 20 oin mai nu’udar faze foun ba kreximentu ekonómiku no dezenvolvimentu sosiál, ne’ebé impulsiona hosi projetu aeroportu ne’e.

“Hanesan Embaixadór Japaun, ha’u sei asegura ba ita-boot sira hotu katak, Japaun no povu sei kontinua sai nafatin sai verdadeiru amigu ba Timor-Leste no nia povu,” nia afirma.

Tuir Diplomata ne’e, Japaun iha kompromisu kontinua ajuda Timor-Leste harii nasaun iha tinan barak ne’ebé sei mai, suporta saida de’it tuir kbiit, ho espíritu solidaridade no amizade.

Serimónia ne’e  partisipa hosi Primeiru-Ministru, Taur Matan Ruak no membru Governu, Reprezentante ADB, Sunil Mitra, Diretór Misaun ADB iha Timor-Leste, Ramesh Subramaniam, Diretór Jerál Departamentu Rejionál Sudeste Aziátiku, Paul Dominguez, Diretór Konsellu Diretivu no Chaorim Shim.

Jornalista : Antónia Gusmão

Editora       : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here