Ministru Prezidente Konsellu Ministru, Fidelis Manuel Leite Magalhães. Imajen TATOLI/Francisco Sony

DILI, 24 setembru 2021 (TATOLI)–Bazeia ba akordu entre Governu Japaun no Timor-Leste, prevee katak Aeroportu Internasionál Prezidente Nicolau Lobato, Comoro, sei iha terminál passajeiru modernu ida ho ninia medida metru 11.653.

Tanba ne’e, liuhosi reuniaun Konsellu Ministru (KM) delibera atu deklara laiha objesaun ba troka nota diplomátika kona-ba akordu ho Governu Japaun, ba apoiu hosi estadu japonés relasiona implementasaun projetu melloramentu Aeroportu Comoro.

“Tuir projetu ne’ebé aprezenta ona hosi Vise-Ministru Negósiu Estranjeiru no Kooperasaun, Julião da Silva. Akordu ne’e prevee katak Aeroportu Internasionál Prezidente Nicolau Lobato sei iha terminál pasajeiru modernu no edifísiu própiu ida ba estasaun enerjia,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, sesta ne’e.

Antes ne’e, KM delibera hodi autoriza selebrasaun akordu finansiamentu ida entre Governu liuhosi Ministéri Finansa (MF) ho Banku Dezenvolvimentu Aziátiku (ADB, sigla ingles) ba implementasaun projetu espansaun Aeroportu Internasionál Prezidente Nicolau Lobato, Comoro.

Notísia relevante: MF-ADB sei selebra akordu projetu espansaun Aeroportu Comoro

Projetu ne’e prevee estensaun ba pista aterrajen, torre foun ida inklui reabilitasaun ba instalasaun sira seluk.

Iha ámbitu espansaun aeroportu, KM delibera atu autoriza dezenvolvimentu projetu faze dahuluk, loke prosedimentu aprovizionamentu tolu, inklui tipu konkursu públiku empreza sir aba konsesaun no konstrusaun fornesimentu servisu supervizaun no jestaun projetu.

Orsamentu ba konstrusaun Aeroportu Internasionál ne’e hosi impréstimu ADB hamutuk millaun $100 no Governu aloka ona millaun $300, tanba konstrusaun aeroportu ne’e sei presiza millaun $480.

Antes ne’e, Governu Japaun hatudu komprimisu atu apoia orsamentu millaun $44 hodi konstrui aeroportu ba komponente lima hanesan terminál ba passajeiru, torre kontrolu, tax way (fatin impostu), access road (asesu rodovia) no fatin para aviaun.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here