Sala Leitura Xanana Gusmão. Imajen/Espesiál.

DILI, 01 outubru 2021 (TATOLI)—Sala Leitura Xanana Gusmão (SLXG) realiza kompetisaun konabá hakerek istória ba labarik ho lian “Makasae no Baiqueno” ne’ebé sei realiza iha munisípiu Baucau, Viqueque, Lautém no Autoridade Rejiaun Administrativa Espesiál Oé-Cusse Ambenu (RAEOA).

Notísia Relevante: Livru “Konta Istória iha Lian Mambae” prezerva lian-inan sai identidade orijen

Ofisiál Projetu Sala Leitura Xanana Gusmão (SLXG), Jeronimo Fernandes, hateten objetivu hosi kompetisaun ne’e fó oportunidade ba timoroan sira hodi dezenvolve sirania abilidade liuhosi hakerek istória lenda no fiksaun, hanesan dalan ida atu promove no prezerva lian lokál ho forma eskrita.

“Kompetisaun hakerek istória iha lian Makasae no Baiqueno iha kategória rua, hanesan lenda no fiksaun ne’ebé ho nia orijinalidade mai hosi komunidade Makasae no Baiqueno ne’e rasik,” Jeronimo Fernandes, hateten liuhosi komunikadu ne’ebé Agência Tatoli asesu, sesta ne’e.

Rezultadu hosi kompetisaun hakerek istória ida-ne’e, SLXG sei produs ba livru, gravasaun audio (CD) no vídeo animasaun ne’ebé sei distribui ba biblioteka no eskola sira hodi kompleta matéria aprendizajen eskola sira iha munispiu Baucau, Viqueque, Lautém no Oé-Cusse.

SLXG realiza kompetisaun ne’e, tanba tuir dadus sensu uma kain 2015 hatudu katak komunidade parte leste hanesan Baucau, Viqueque, no Lautém barak liu ko’alia lian Makasae ne’ebé ho nia persentajen 10.5%, no tuir mai komunidade sira iha parte Oeeste hanesan Oé-Cusse ko’alia lian Baiqueno ho nia persentajen 5.9%.

“Ho nune’e, ba tinan ida ne’e, Sala Leitura Xanana Gusmão (SLXG) deside hili lian inan Makasae no Baikenu ba prioridade kompetisaun espesiál ida-ne’e,” nia dehan.

Tuir nia, lian lokál importante tebes ba Timor-Leste nia diversidade no identidade kulturál nu’udar povu ida no nasaun independente ida, tanba ne’e lian sira-ne’e tenke prezerva no promove nafatin atu labele lakon.

Antes ne’e, iha tinan 2019, Sala Leitura Xanana Gusmão (SLXG) hetan apoiu fundu hosi Governu Victoria Austrália hodi halibuur istória lenda iha lian Mambae ho susesu tebes.

“Ami kolekta istória liu hosi konkursu hakerek dala tolu entre tinan 2019 no 2020. Konkursu ne’e hetan partisipasaun maka’as hosi joven no estudante sira. Ami hili istória sanulu resin-rua mak konsidera di’akliu, hafoin halo ilustrasaun imajen, prodús livru no versaun audio ne’ebé mak lansa tiha ona iha loron 21 Maiu 2021. Livru versaun PDF ami tau ona iha website Sala Leitura nian, ema hotu bele asesu atu lee ka donwload rasik,” nia informa.

Ba tinan ida ne’e, Sala Leitura Xanana Gusmão (SLXG) foka ba kolesaun istória lokál iha lian rua “Makasae no Baiqueno”.

“Ami anúnsiu ona konkursu hodi komunidade sira hosi lian Makasae no lian Baikenu bele partisipa, liu-liu joven no estudante sira atu promove liután sira-nia talentu hakerek,” nia afirma.

Kritériu ba kompetisaun konabá hakerek istória ba labarik ne’e iha kategória rua mak hanesan fiksaun no lenda mak konteudu istória konabá domin, dame, esperansa, bele uza figura ema, animal no natureza tanba istória ne’e sei dedika ba labarik sira.

“Ami husu atu istória laran labele ko’alia konabá violensia, ran, droga, hemu, fuma, asédiu seksuál, tolok, taru osan ka hahalok negativu sira seluk,” nia informa.

Kritériu ba kategória hakerek istória Aiknanoik mak konteudu istória hakerek konabá kultura, ritus tradisionál, lenda, aiknanoik, ne’ebé nia orijim mai hosi komunidade sira ho lian Makasae no Baiqueno.

Nune’e, kada istória nia kuantidade liafuan mínimu 300 no masimu liafuan 500, no tenke hakerek ho maneira ne’ebé simples no fasil atu kompreende tanba istória ne’e atu dedika ba labarik sira iha nível Préeskolar.

“Sekarik itaboot sira foti istória ne’e hosi ema seluk ruma, konsidera atu mensiona ema ne’ebé sai fontes ba istória,” nia dehan.

Iha kompetisaun ne’e, ba manan na’in hosi kategória fiksaun hanesan, manan na’in dahuluk sei hetan $100, manan na’in daruak sei hetan $75 no manan na’in datoluk sei hetan $50 ho sertifikadu.

Enkuantu, manan na’in hosi kategória istória Aiknanoik hanesan, manan na’in dahuluk sei hetan $75, manan na’in daruak sei hetan $50 no manan na’in datoluk sei hetan $25 ho sertifikadu.

Entretantu, programa kompetisaun hakerek istória ne’e, implementa tanba Sala Leitura Xanana Gusmão (SLXG) hetan tulun hosi Governu Vitória – Australia ho fundu tinan fiskal 2021.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here