Kapa oin livru “Konta Istória iha Lian Mambae”. Imajen/Espesiál.

DILI, 21 maiu 2021 (TATOLI)—Sala Leitura Xanana Gusmão selebra Loron Mundiál ba Diversidade Kulturál, Diálogu no Dezenvolvimentu Nian (21 fulan-maiu), ho lansamentu livru “Konta Istória iha Lian Mambae” ne’ebé autór timor-oan sira hakerek liuhosi meu online (zoom), ne’ebé realiza iha edifísiu Sala Leitura Xanana Gusmão, Lecidere, Dili.

Jestór Sala Leitura Xanana Gusmão, Gaspar Quintino Freitas, hateten selebrasaun ba Loron Mundiál ba Diversidade Kulturál, Diálogu no Dezenvolvimentu Nian ne’e, importante duni tanba ema hotu moris iha sosiedade plurál hanesan nasaun ida no mós hola parte iha sosiedade mundu tomak nian ne’ebé moris ho diversidade kultura, dialetu, tradissaun no valór sira seluk nu’udar rikusoin hosi beiala sira’nian, ne’ebé mak ohin loron ema bele uza loro-loron ba diálogu no dezenvolvimentu umana.

“Livru ‘Konta Istória iha Lian Mambae. ne’e espesiál tebes. Tanba primeira-vez ami serbisu hamutuk ho Mambae-oan sira, mesak joven de’it ne’ebé ho domin boot ba sira-nia lian rasik.  La’os de’it atu inspira ema seluk maibé atu hatudu orgullu ba sira-nia lian-inan sai identidade orijen no eransa bei-ala sira-nian, ne’ebé mak ita tenke prezerva ba nafatin,” Gaspar Quintino Freitas hateten liuhosi ninia mensajen hodi loke eventu online ba lansamentu livru “Konta Isória iha Lian Mambae”, sesta ne’e.  

Tanba, nia hatutan, lian lokál sira barak mak hahú atu lakon ona no balun lakon daudauk ona no ida-ne’e tenke sai atensaun Timor-oan sira-nian hodi la hein ema halo peskiza ruma, karik la’os tenke ema hosi rai-li’ur (estranjeiru) mak atu halo peskiza no hakerek.

Jestór Sala Leitura Xanana Gusmão, Gaspar Quintino Freitas (liman karuk), hato’o mensajen abertura ba lansamentu livru “Konta Istória iha Lian Mambae”, sesta (21/05) ne’e. Imajen/Espesiál.

“Ita, Timor-oan bele hahú daudauk hodi rekorda lian sira mak ita ko’alia rasik hodi hakerek istória populár sira, poema, múzika, no halo ka hakerek disionáriu. Ho esperansa katak bele hariku liután ita-nia lian nasionál Tetun sai forte liután, no bele mós halo diskusan ka teatru iha iha ita-nia lian rasik. Buat ne’ebé ami manan ona hosi esperiénsia hala’o projetu produsaun livru ida-ne’e, mak hola parte iha halo esforsu ki’ik ida hodi rekorda netik ita-nia lian-inan Mambae iha formatu eskrita no audio ho tradusaun Tetun,” nia esplika.

Jestór Sala Leitura Xanana Gusmão ne’e infroma, livru ne’e Sala Leitura Xanana Gusmão sei fahe ba parseiru biblioteka no rádiu komunidade sira iha Aileu, Ermera no Dili, hodi nune’e komunidade Mambae liu-liu labarik ki’ik-oan sira ho sira-nia inan-aman bele hetan benefisiu hosi projetu ida-ne’e.

Iha biban ne’e, reprezentante autór, Isaias Carceres hato’o agradesimentu ba Sala Leitura Xanana Gusmão tanba ho esforsu boot hodi halibur aiknanoik populár hosi komunidade Mambae liuhosi kompetisaun hakerek no to’o ikus halo ona lansamentu ba livru refere.

“Iha oportunidade ida-ne’e, ha’u lori partisipante no komunidade Mambae tomak nia naran hakarak hato’o agradesimentu kle’an ba Sala Leitura Xanana Gusmão no Governu Victoria ba realizasaun kompetisaun hakerek kona-ba aiknanoik populár iha lian-inan Mambae. Ida-ne’e nu’udar dalan di’ak ida hodi dezenvolve no prezerva lian-inan Mambae, no ha’u fiar katak projetu ida-ne’e bele dezenvolve di’ak liután lian inan sira hotu ne’ebé eziste iha ita-nia rai doben Timor-Leste,” nia dehan.

Hanesan partisipante (autór) no mós nu’udar komunidade Mambae ida, nia kontente tebes tanba iha biban osa-mean ida-ne’e nia bele dezenvolve fila-fali aiknanoik antigu Timor-Leste nian ne’ebé lakon daudaun ho lian inan.              

“Lian-inan sai hanesan lian identidade no patrimóniu kulturál ne’ebé presiza mantein no dezenvolve,” nia hateten.    

Entretantu iha livru ne’e nia ‘Lian Maklokek’, Fundadora no Prezidente Konsellu Sala Leitura Xanana Gusmão, Kirsty Sword Gusmão hateten istória kolesaun iha livru “Konta Istória iha Lian Mambae” ne’e hanesan kontribuisaun literáriu hosi joven sira atu valoriza no konserva Timor-Leste nia lia-inan.

“Tanba ne’e, importante tebes atu valoriza no konserva Timor-Leste nia lian sira hanesan parte integrante hosi identidade kulturál nasaun nian. Istória sira iha kolesaun ida-ne’e hanesan kontribuisaun literáriu husi joven feto no mane sira-ne’ebé hakaas aan atu tane aas sira-nia lian hanesan meiu hatutan kultura nian,” nia hateten.

Konteudu balun iha livru “Konta Istória iha Lian Mambae”. Imajen/Espesiál.

Iha parte seluk, liuhosi mensajen ne’ebé Vise-Ministru Edukasaun, Juventude no Desportu, António Guterres, hakerek iha livru laran ne’e haktuir knaar importante ida hosi Ministériu Edukasaun, Juventude no Desportu mak atu reforsa lian ofisial rua, Tetun ho Portugués, nu’udar lian instrusaun ka lian ne’ebé uza ba prosesu ensinu aprendizajen iha eskola iha Timor laran tomak, no hala’o nia devér konstitusionál atu prezerva, promove, defende no valoriza partimóniu kulturál Timor-Leste nian.

“Ho haksolok ha’ u lori Ministériu Edukasaun, Juventude no Desportu nia naran hakarak kongratula ekipa Sala Leitura Xanana Gusmão ba dedikasaun no komitmentu hodi prezerva no promove lian lokál sira iha Timor liuhosi dokumentasaun hanesan livru “Konta Istória iha Lian Mambae”. Lian Mambae ko’alia iha munisípiu Ermera, Aileu, Ainaro, Same no Likisá hanesan lian lokál ne’ebé jeográfikamente maioria uza ka koa’lia iha Timor laran,” nia dehan.

“Ha’u hanoin livru mak sai hanesan matadalan ida iha prosesu ensinu aprendizajen. Livru mós bele sai hanesan belun ida-ne’ebé mak iha tempu mesak sei hamaluk ita no livru nakonu ho istória badak sira sei motiva ita atu lee barak liután. Hanesan istória Maukuru ho Makikit (Maukuru nor Naufaia) ne’ebé imi sei lee katak Makikit rua lori Maukuru semo hale’u rai,” nia haktuir.

Liuhosi lee, nia dehan, sei lori no hatudu ba lee-na’in sira mundu ho koñesimentu foun, esperiénsia no perspetiva oioin, tanba nia parte enkoraja Timor-oan hotu atu prátika lee loro-loron sai tradisaun moris nian tanba hatoman aan lee sei halo ema susesu.

“Hein katak istória sira-ne’e hafoin imi lee, la’os hotu iha imi de’it maibé imi mós bele konta tutan ba imi-nia família no kolega sira-ne’ebé la asesu ba livru ne’e, atu sira mós hatene. Ida-ne’e, nu’udar dalan ida atu kontinua tane no konserva ita-nia istória, ita-nia identidade no ita-nia kultura hanesan Timor-oan,” nia dehan.

Projetu livru ida-ne’e nu’udar rezultadu hosi Projetu Lian Inan-Aoiu Biblioteka Públiku Timor-Leste ne’ebé mak implementa hosi Sala Leitura Xanana Gusmão hetan tulun hosi Governu Victoria-Departamentu ba Ambiente, Rai, Bee, no Planeamentu liuhosi Programa Victoria ba Timor-Peste.

Livru “Konta Istória iha Lian Mambae” ne’ebé lansa hosi Embaixadór Austrália iha Timor-Leste, Peter Roberts, no ho pájina 59 ne’e kompostu hosi aiknanoik hamutuk 12 ne’ebé hakerek iha lian Mambae hosi Aileu, Ainaro, Ermera no Manufahi.

Kapa oin-kotuk livru “Konta Istória iha Lian Mambae”. Imajen/Espesiál.

Eskritór (autór) sira-ne’ebé hakerek livru ne’e mesak joven timor-oan de’it mak hanesan; Isaías Carceres Mendonça (idade 33, Aileu) hakerek istória “”Slok Mauntut” ka “Mota Manatuto” no “Laha Ni Matenek ka “Laho Nia Matenek”, Domingas Reissureição da Costa Ximenes (idade 23, Manufahi/Same) hakerek istória “Ertanu” ka “Betanu”,  Bosco de Deus Amaral (idade 22, Ermera) hakerek istória “Duda nor Nu’un” ka “Lakeru ho Ai-Hali”, António Soares Martins (idade 36, Ermera) hakerek istória “Tel Tun Tgout” ka “Ai-Talik Kotu”.

Autór seluk mak Manuel Soares (idade 26, Ermera) hakerek istória “Mauloko Nor Bib-Rus” ka “Mauloko ho Bibi-Rusa”, Abilio Soares (idade 37, Ainaro) hakerek istória “Lokobere Nor Simau” ka Lokobere ho Simaun”. Rosalina da Costa Mendonça (idade 25, Aileu) hakerek istória “Makukur Nor Naufala” ka Maukukur ho Makikit”, Aurora Alexandra Maria da Conceição (idade 24, Ainaro) hakerek istória “Daubere Nor Arbaua” ka “Daubere ho Karau”, Elizeu Seixas dos Santos (idade 30, Ermera) hakerek istória “Atatlau”, Agostinho da Graça Felo (idade 28, Aileu) hakerek istória “Oid Modon Truka Nor Siladan” ka “Lori Modo Troka ho Espellu” no “Dar Atuba Maklili La Kuda” ka “Hosi Ema Nakfilak Aan Ba Kuda”.

Jornalista: Osória Marques 

Editór: Cancio Ximenes

HAKEREK NO HATÁN

Please enter your comment!
Please enter your name here