Bispu Dioseze Dili, Virgílio do Carmo da Silva, fó bensaun ba estátua Papa Paulo VI, iha aniversáriu Escola Paulo VI ba dala-40, kinta (26/09/2019). Imajen TATOLI/António Gonçalves

DILI, 01 outubru 2021 (TATOLI)–Colégio São José Operário (CSJO) no Fundasaun Eskola Privada Paulo VI, fó toleránsia pagamentu propina ba estudante, tuir maneira eskola, iha ámbitu pandemia.

“Iha situasaun normál, eskola ezije kada estudante iha devér atu halo ninia konstribuisaun propina durante tinan tomak (fulan-12), maibé iha pandemia, ita fó toleránsia ba inan-aman sira selu propina ba fulan-10 de’it,” Diretór CSJO, Padre Cesar Magno, hateten ba Agência TATOLI, iha ninia knaar fatin, Balide, sesta ne’e.

Tuir Responsável ne’e, eskola fó livre propina ba fulan-rua tanba durante pandemia no impozisaun serka sanitária no konfinamentu obrigatóriu, halo eskola labele fasilita estudante sira hala’o prosesu aprendizajen iha aula prezensiál.

Notísia relevante: MEJD autoriza eskola 99 iha Dili reativa aula prezensiál

Tuir Padre Cesar, sistema selu propina la’o tuir etapa, ne’ebé inan-aman sira bele selu to’o etapa dalimak ho valór propina diferente.

“Propina ba estudante ensinu báziku primeiru no segundu siklu, diferente ho estudante ensinu báziku terseiru siklu no ensinu sekundáriu nian. Valór propina ba estudante ensinu sekundáriu kada fulan $14, ensinu báziku terseiru siklu $12 no ensinu báziku primeiru no segundu siklu $5,” nia esplika.

Iha fatin ketak, Adjunto Diretór Eskola Paulo VI, Atanásio António da Silva, hateten, pagamentu propina selu tuir pakote (fulan-haat), ne’ebé kada pakote ho valór $120, maibe iha ámbitu COVID-19 ne’e, eskola fó ona toleránsia ba inan-aman sira iha segundu períodu.

“Ita fó toleránsia iha segundu períodu fulan-haat ne’e ba inan-aman sira atu selu de’it metade, signifika propina $120, bele selu de’it $60, metade sira la selu,” nia akresenta.

Tuir Adjunto Diretór Eskola, inan-aman balun seidauk komprende no mai protesta iha eskola, ho razaun durante ne’e Governu suspende atividade aula prezensiál no estudante sira la hetan matéria.

“Iha ámbitu COVID-19 nia laran, profesór sira kontinua serbisu prepara rezumu matéria ba estudante sira inklui matéria online. Ho kestaun sira ne’e hotu, maka eskola deside la halakon propina, maibé fó toleránsia ba inan-aman sira iha segundu períodu. Tanba profesór sira ne’ebé iha eskola, kontratu no tenki hetan saláriu,” nia hatutan.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here