Estudante Ensinu Báziku Canossa partisipa aula prezensiál, segunda (20/09). Imajen TATOLI/António Gonçalves

DILI, 20 setembru 2021 (TATOLI)–Ministériu Edukasaun Juventude no Desportu (MEJD) liuhosi Diresaun Edukasaun munisípiu Dili, autoriza ona eskola hamutuk 99 reativa aula prezensiál tanba profesór 90% kompleta ona vasina.

Diretór Servisu Edukasaun munisípiu Dili, Duarte Bragança, hateten, durante semana ida halo verifikasaun dadus iha eskola 199 ba profesór-sira ne’ebé simu vasina, hosi nível edukasaun pre-eskolár, ensinu bázika to’o nível sekundáriu, maibé aprova de’it eskola 99 maka bele hahú ona aula prezensiál.

“Ita-nia eskola 99 hetan ona aprovasaun hosi MEJD atubele re-ativa atividade aula prezensiál, kompostu hosi pre-esklolár 39 hosi eskola 60, ensinu báziku 47 hosi eskola 106, ensinu sekundáriu Jerál (ESJ) 12 hosi eskola 24 no Eskola Sekundáriu Tékniku Vokasionál (ESTV) ida hosi eskola sia,” Diretór ne’e hateten iha edifísiu Prezidente Autoridade munisípiu Dili, Matadoro, segunda ne’e.

Notísia relevante: Reativa aula prezensiál hein despaixu hosi MEJD

MEJD autoriza eskola sira reativa aula prezensiál tanba prienxe rekezitu no protokolu saúde hosi Organizasaun Mundiál Saúde (OMS) no Ministériu Saúde (MS).

Tuir regra prevensaun, ezije kada eskola tenke instala fasilidade prevensaun COVID-19 no mós númeru profesór iha kada eskola simu vasina tenke atinje 90%.

Enkuantu, totál profesór iha Dili ne’ebé hetan ona vasina COVID-19 hamutuk 2.565 ne’ebé ekivalente 80,79%.

Iha sorin seluk, Diretór Eskola ESJ Nicolau Lobato, Comoro,  Marcos Pacheco, informa, parte eskola reativa ona aula prezensiál tanba profesór hamutuk 19 kauze vasina hotu, falta na’in-ida mak seidauk tanba moras komplikadu.

“Ami reativa ona eskola no hahú kedan realiza ezame períodu daruak ba estudante hamutuk 1.200, kompostu hosi décimo ano na’in-456, décimo primeiro  na’in-377 no décimo segundo na’in-367,” nia akresenta.

Nune’e mós, Diretór Eskola Ensinu Báziku Sentrál (EBC, sigla portugés) Cristál, Fernando Mesquita, hateten, MEJD seidauk autoriza reativa aula prezensiál tanba profesór-sira seidauk simu vasina hotu.

Totál profesór hamutuk 28 inklui seguransa eskola na’in-ida, maibé balun seidauk simu vasina.

“Ita sei falta profesora na’in-haat mak seidauk simu vasina tanba mesak inan fó susu-been ba oan de’it, nune’e sira sei hetan fali oportunidade tuir mai hodi tuir vasina,” nia  subliña.

Jornalista : Tomé Amado

Editora     : Julia Chatarina

HAKEREK NO HATÁN

Please enter your comment!
Please enter your name here