Ministru Edukasaun Juventude no Desportu (MEJD), Armindo Maia. Imajen Tatoli/Sérgio da Cruz.

BOBONARO, 30 setembru 2021 (TATOLI)—Ministru Edukasaun Juventude no Desportu (MEJD), Armindo Maia, hato’o parabens ba serbisu edukasaun munisípiu Bobonaro, tanba númeru vasina kontra COVID-19, atinje ona 80%, hosi profesores Pré-eskolár to’o Sekundáriu Jerál inklui funsionáriu edukasaun.

“Ha’u kontente no hato’o parabens ba profesór ho funsionáriu edukasaun iha munisípiu ne’e, ne’ebé simu ona vasina, atu prevene an hosi surtu COVID-19,” Armindo Maia, espresa iha lansamentu sosializasaun programa eskola ba uma no tele-eskola ba diretór no koordenadór eskola-sira iha Bobonaro, kinta ne’e.

Notísia relevante:SEFOPE Bobonaro suspende programa kapasitasaun ba estudante sira

Nia esplika, MEJD hasai ona sirkulár ida ona katak, profesór sira iha Dili la vasina 90%, trava aula prezensiál no la presija reativa, ba munisípiu MEJD labele ezije atu atinje hanesan, maibé pelus menus 70%.

Tuir nia haree katak, munisípiu Bobonaro númeru vasina hosi profesór-sira atinje ona 80%, ida ne’e hanesan ezemplu ne’ebé di’ak.

Iha Fatina hanesan, Diretór Serbisu Edukasaun Munísipiu Bobonaro, Crispin Moniz, relata katak, profesór iha munisípiu ne’e iha 80% mak simu ona vasina Astrazeneca doze dahuluk no kompletu.

Totál profesór ne’ebé simu ona vasina hosi nível Pré-eskolár no Ensinu Báziku hamutuk 1.014 no hosi parte Sekundáriu Jerél ho Tékniku Vokasionál hamutuk 1.058, hosi totál ne’e mak edukasaun Bobonaro rejista profesór 80% simu ona vasina.

Totál funsionáriu edukasaun munisipál Bobonaro hamutuk 1.621, kompostu hosi profesór, funsionáriu eskritóriu, INFORDEPE no funsionáriu inspesaun.

Daudaun ne’e MEJD suspende hela aula prezensiál iha postu administrativu Maliana no Cailaco, hahu 02 setembru até agora seidauk reativa, tanba evolusaun surtu COVID-19 iha postu rua ne’e, kontinua rejista aas kada loron.

Despaixu suspensaun ne’e la abranje to’o postu administrativu, Bobonaro, Loloto’e, Balibo no Atabae.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here