Diretór Jerál STAE, Acilino Manuel Branco. Imajen/Espesiál.

DILI, 02 setembru 2021 (TATOLI)—Diretór Jerál Sekretáriu Tékniku Administrasaun Eleitorál (STAE), Acilino Manuel Branco, hateten se kazu pozitivu COVID-19 iha Timor-Leste menus, ekipa téknika resensiamentu eleitorál sei dezloka ba diaspora iha 14 setembru.

Notísia Relevante: Ekipa téknika resensiamentu eleitorál sei voo ba diaspora

“Ita laiha aviaun rasik (própriu) para ita dehan bainhira mak dezloka ba rai refere tanba ita depende ba aviaun ne’ebé iha possibilidade atu mai ita-nia rain tuir kontaktu ho ajénsia sira. Maibé podeser iha loron 14 setembru ita iha ona aviaun no laiha kazu pozitivu COVID-19 ne’ebé aumenta no laiha impedementu ruma mak to’o iha loron 14 setembru, ekipa bele aranka on aba diaspora,” Diretór STAE ne’e hateten ba Agência TATOLI, iha nia knaar fatin, Vera Crus, Dili, kinta ne’e.

Nia hateten, buat hotu disponibilidade ba ajénsia aviaun no aviaun ne’e bele mai ka lae, nomós kestaun ida tan mak bainhira aviaun iha tiha mak nasaun ne’ebé atu halo resensiamentu eleitorál ne’e la admite atu tama ka iha hela lockdown ruma, mak defísil ekipa atu aranka.

“Ita mós koordena ho Diretór Jerál Ministériu Saúde nian atu informa informasaun sira liga ho pandemia ne’e atu oinsá ita-nia ekipa ba ne’e seguru no nasaun balun labele dúvida ho ita-nia prezensa. Tauk mak sira dehan ita lori moras ba sira-nia rain. Tanba ne’e mak ita halo preparasaun di’ak ida hafoin aranka. Tempu agora la hanesan uluk,”  nia dehan.

Preparasaun téknika ne’e, tuir loloos prontu ona no loloos ne’e ekipa dezloka ona maibé dezafiu ne’ebé Timor-Leste enfrenta mak iha hela konfinamentu obrigatóriu, entaun ikus deside tenke adia dezlokasun ba diaspora nian.

“Ita la’o tuir de’it empreza Aéreo sira fasilita ita-nia voo hosi Dili to’o fatin ne’ebé ita atu ba hanesan Portugál, Corea, Irlandia no Australia. Tanba aviaun sira la semo hanesan tempu sira uluk tanba ne’e mak ekipa sira ne’ebé dezloka preparadu ona no hein billete tanba ita mós iha hela koordenasaun ho ajénsia Aviaun sira-nian,” nia hateten.

Planu no durasaun ba hala’o resensiamentu eleitorál iha diaspora ne’e, la’o to’o fulan haat ho balun ne’ebé tuir planuu ne’e hahú hosi fulan-setembru 2021 to’o fulan-janeiru 2022.

“Kona-ba diaspora ne’e ita-nia planu atu halo iha 01 setembru no nia terminasaun ne’e hanesan de’it, taka iha 15 janeiru 2022. Governu aprova tiha ona rezolusaun kalendáriu no fixa ba rai-li’’ur nian. Oras ne’e dadaun, ita iha faze preparasaun téknika nia-laran,”  nia dehan.

Kona-ba resensiamentu eleitorál iha rai-laran, nia dehan, ekipa tékniku hahú hala’o ona iha 01 jullu no to’o agora sei la’o hela no sei ramata iha fulan janeiru 2022.

Maske Governu aplika hela regra konfinamentu domisili’ariu iha munisípiu balun maibé STAE nafatin kumpre regra ne’ebé iha hodi fó atendementu ba sidadaun sira-ne’ebé mak presiza.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here