Xefe Gabinete SEKOMS, Osório Almeida, asina akordu transferénsia subvensaun ho suku rua, iha lasaun enkontru SEKOMS, Palásiu Governu. Imajen TATOLI/Jogerjo Guterres

DILI, 29 setembru 2021 (TATOLI)–Sekretaria Estadu Komunikasaun Sosiál (SEKOMS) fó subvensaun ba suku Fuat, postu Iliomar, munisípiu Lautém no suku Seloi Kraik, postu Aileu villa, munisípiu Aileu, hodi estabelese sentru informasaun ba programa ‘Naroman ba Suku’.

“Ohin SEKOMS selebra kontratu ho suku Fuat no Aieu atu estabelese sentru informasaun iha suku rua ne’e,” Xefe Gabinete SEKOMS, Osório Almeida, hateten, hafoin reprezenta Sekretáriu Estadu Komunikasaun Sosiál, Merício Juvinal dos Reis Akara, asina akordu transferénsia subvensaun ba suku rua, iha salaun enkontru SEKOMS, Palásiu Governu, kuarta ne’e.

Estabelesimentu sentru informasaun suku ho objetivu atu disemina informasaun potensialidade suku mai ba nasionál.

“SEKOMS apoia $10.000 ba kada suku hodi bele instala fasilidade iha sentru informasaun suku ne’e, tanba ne’e, husu suku rua ne’ebé hetan apoia bele la’o di’ak, nune’e fó benefisiu ba komunidade suku rua,” Reprezentante SEKOMS ne’e fó hanoin.

Iha fatin hanesan, Xefe suku Fuat, Martins Pinto, agradese ba SEKOMS tanba bele estabelese programa iha suku.’

“Nu’udar Autoridade lokál, sei esforsu hasa’e kapasidade joven sira iha suku Fuat, nune’e bele disemina informasaun kona-ba potensialidade suku,” nia akresenta.

Antes ne’e, SEKOMS lansa programa Naroman ba Suku iha suku Fuat, iha loron 01 jullu 2021, ho hanoin bele habelar informasaun entre suku no Governu sentrál.

Suku Fuat kompostu hosi aldeia Acadirulo, Rumutau no Vataomar, ho totál populasaun hamutuk 1.400 resin.

Aleinde ne’e, iha loron 16 fevereiru 2021, SEKOMS introdúz programa Naroman ba Suku iha suku Seloi Kraik.

Notísia relevante: 2021, SECOMS sei harii Sentru Informasaun iha Suku Seloi Craik

Durante tinan 2019 to’o 2020, SEKOMS konsentra uluk ba suku ualu, ne’ebé suku tolu lokalizadu iha parte leste, hanesan Hae-coni iha postu administrativu Baguia, munisípiu Baucau, suku Muapetine no Lore II iha munisípiu Lautém, parte sul iha suku Liurai, munisípiu Aileu no suku Rotuto, iha munisípiu Manufahi, enkuantu parte oeste iha suku Leo-hitu no Soelesu iha munisípiu Bobonaro no suku Batumanu, postu administrativu Atsabe, munisípiu Ermera.

Enkuantu iha tinan 2021, programa Naroman ba Suku implementa tan iha suku haat tuir kapasidade no rekursu ne’ebé SEKOMS iha.

Ba kada suku ne’ebé sai benefisiáriu, SEKOMS fó apoiu orsamentu maizumenus $10.000 liuhosi transferénsia públika, hodi harii sentru informasaun ba komunidade no implementa programa Naroman ba Suku.

Programa Naroman ba Suku nu’udar programa pilotu hosi VIII Governu Konstitusionál liuhosi SEKOMS, ho objetivu haat mak hanesan promove asesu ba informasaun iha suku rurál no hakbiit komunidade sira-nia kapasidade asesu ba informasaun.

Programa ne’e buka atu lori informasaun ba nível lokál besik ba komunidade sira iha suku hodi fó dalan ba komunidade atu hato’o sira-nia preokupasaun ka obstákulu hodi aprezenta ba meiu komunikasaun nasionál sira.

Jornalita : Natalino Costa

Editora   : Julia Chatarina

HAKEREK NO HATÁN

Please enter your comment!
Please enter your name here