Xefe Suku Seloi Craik, Gabriel Mendonça, kahe tais ba Secretário do Estadu para a Comunicação Social (SECOMS), Mericio Juvinal Akara, bainhira hala’o vizita ba Suku Seloi Craik. Imajen TATOLI/Arminda Fonseca.

AILEU, 16 fevereiru 2021 (TATOLI)—Secretário de Estado para a Comunicação Social (SECOMS), Merício Juvinal dos Reis Akara, ohin, hala’o diálogu komuntáru ho komunidade sira iha Suku Seloi Craik, Postu Administrativu Aileu Vila, Munisípiu Aileu, hodi ko’alia kona-ba planu atu harii no halo lansamentu ba sentru informasaun iha suku refere.

Notísia Relevante: Sekretáriu Estadu Akara Vizita Suku Liurai Hodi Haree Progresu Programa Naroman ba Suku

Governante ne’e hatutan, objetivu hosi diálogu ne’e ko’alia ho komunidade sira oinsá atu harii no halo lansamentu ba sentru informasaun iha suku refere tanba atividade ida-ne’e hanesan kontinuasaun ida hosi programa “Naraoman Ba Suku” ne’ebé mak SECOMS hala’o iha tinan kotuk. 

“Ohin, diálogu komunitáriu ne’e konsentra liu-bá planu lansamentu sentru informasaun iha Suku Seloi Craik nian. Hosi dilálogu ne’e ita iha planu ona atu dezenvolve sentru informasaun ida iha Suku Seloi Craik, tanba sentru informasaun ne’e bainhira harii ona fó vantajen ba komunidade sira, tanba sei promove no fasilita informasaun hotu-hotu ne’ebé komunidade hala’o iha suku laran,” Merício Juvinal dos Reis Akara hateten ba jornalista sira iha Suku Seloi Craik, tersa ne’e.

Nia dehan, sentru informasaun suku nian ne’e importante tanba sei kobre atividade no dezenvolvimentu suku nian hanesan poténsia Turimu, kulturál, produtu hortíkultura no seluk tan. Tanba ne’e, nia dehan, SECOMS apoiu halo divulgasaun no promosaun atu bele fasilta diálogu komunitáriu ne’e ho populasaun sira.

“Liuhosi diálogu ne’e, ekipa tékniku SECOMS nian hahú ona hanoin atu halo preparsaun ba lansamentu sentru informasaun foun iha Seloi Craik, tanba durante ne’e halo ona sentru informasaun balun hanesan projetu pilotu iha Timor laran tomak. Tinan ne’e, SECOMS hanoin atu estende tan ba suku rua, tanba ne’e suku ida mak Seloi Craik no suku seluk ne’e ekipa tékniku sei haree hela,” nia esplika.

Entretantu, reprezentante komunidade sira-ne’ebé reprezenta hosi Xefe Suku Seloi Craik, Gabriel Mendonça, hato’o agradesimentu ba SECOMS tanba hili ona sira-nia suku ne’e atu harii sentru informasaun suku nian.

“Ami kontente tebes ba programa Naroman ba Suku ne’ebé tinan ne’e sei implementa iha ami-nia suku. Tanba, ha’u fiar katak liuhosi programa ne’e sei ajuda komunidade Suku Seloi Craik, tanba durante ne’e ami iha produsaun sira hanesan agrikultór ho atividade hórtikultura maibé dala ruma ami labele promove tanba ami ladún hatene informasaun ka mídia kobre lato’o,” nia dehan.

Nia hatutan, fatin ne’ebé atu uza hodi harii ba Sentru Informasaun ne’e komunidade prepara ona no hein de’it desizaun hosi Governu bainhira mak atu hahú konstrusaun ne’e. Líder komunitária ne’e mós hein katak liuhosi programa Naroman ba Suku ne’e bele tulun komunidade sira-nia difikuldade ne’ebé durante ne’e sira hasoru atu ema hotu bele hatene.

Jornalista: Arminda Fonseca

Editór: Cancio Xiemenes

HAKEREK NO HATÁN

Please enter your comment!
Please enter your name here