Diretór Servisu Edukasaun Baucau, Augusto Hornai Ximenes. Imajen TATOLI/Natalino Belo

BAUCAU, 28 setembru 2021 (TATOLI)–Diretór Servisu Edukasaun munisípiu Baucau, Augusto Hornai Ximenes, hateten, profesór hamutuk 1.860 hosi totál mak simu ona vasina, ne’ebé reprezenta 84%.

“Munisípiu Baucau liu ona 70%, ita atinje ona 80% resin, enkuantu bazeia ba karta sirkulár, nia konteúdu hateten katak profesór sira tenke simu vasina ho alvu ne’ebé ministériu fó,” Diretór hateten hafoin remata abertura enkontru ho diretór eskola iha salaun Servisu Edukasaun munisipál, Villa nova, tersa ne’e.

Notísia relevante: Servisu Edukasaun suspende aula prezensiál durante serka sanitária iha Baucau

Governu liuhosi Ministériu Edukasaun Juventude no Desportu (MEJD) fó sai karta sirkulár, ne’ebé mensiona katak mínimu profesór 70% iha eskola ida tenke partisipa vasina mak foin reativa aula prezensiál.

Tuir dadus hosi Servisu Edukasaun Baucau, totál profesór iha Baucau hamutuk na’in-2.215, ne’ebé na’in-1.373 (62%) mak kompleta ona vasina doze daruak no na’in-487 (22%) foin simu doze dahuluk, nune’e hela de’it 354 (16%) mak seidauk vasina tanba kestaun saúde pesoál, partu no balun laiha justifikasaun klaru.

Biban ne’e, Diretór Servisu munisipál enkoraja profesór sira ne’ebé seudauk vasina, tempu besik bele hakbesik-an ba sentru saúde atu tuir kampaña vasinasaun, nune’e hasa’e imunidade pesoál no garante prosesu aprendizajen iha aula prezensiál.

“Tempu besik bele hakbesik-an atu simu vasina, tanba kuandu profesór sira simu ona vasina, ita hein fali alunu sira,” Augusto akresenta.

Iha fatin hanesan, Diretór Eskola Ensinu Báziku Seisal, Luís da Silva Correia, hateten, profesór ne’ebé daudaun ne’e hanorin iha eskola ne’e hamutuk iha 39, ne’ebé profesór hotu kompleta vasina ona vasina doze dahuluk no daruak.

“Ami-nia profesór hirak ne’e simu kompletu hotu ona vasina, tanba ne’e ami prontu ona re-ativasaun prosesu aprendizajen,” nia hatutan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here