Diretór Servisu Edukasaun munisipál Baucau, Augusto Hornai Ximenes. Imajen TATOLI/Natalino Belo

BAUCAU, 28 agostu 2021 (TATOLI)—Diretór Servisu Edukasaun munisipál Baucau, Augusto Hornai Ximenes, hateten, aula prezensiál daudaun ne’e suspende provizóriu relasiona ho implementasaun serka sanitária iha Baucau.

Governu impoin hikas serka sanitária iha Baucau hahú tuku 23:59 loron 26 agostu 2021 to’o tuku 23:59 loron 08 setembru 2021 tanba haree ba evolusaun COVID-19 iha rejiaun ne’e.

“Horiseik Ministériu Edukasaun, Juventude no Desportu (MEJD) fó sai ona despaixu hosi gabinete ministériu kona-ba suspensaun ensinu aprendizajen prezensiál iha Baucau,” Diretór Edukasaun hateten ba Agência TATOLI, iha ninia knaar fatin, Villa nova, sesta ne’e.

Notísia relevante: Serka sanitária iha Baucau-Covalima hahú aban to’o 08 setembru

Nune’e, hafoin simu despaixu ne’e, Servisu Edukasaun munisipál hatutan orientasaun ba diretór ensinu hotu iha Baucau atu kumpre despaixu hosi MEJD.

Despaixu iha pontu rua importante hanesan suspende totál provizóriumente atividade aprendizajen aula prezensiál no kontinua distribui materiál liuhosi meiu komunikasaun sosiál ou diretamente ba estudante sira.

Nune’e, Servisu Edukasaun munisipál husu diretór eskola sira hodi orienta  profesór sira ativu uza meiu komunikasaun sira hodi nafatin mantein komunikasaun ho estudante no partilla informasaun no matéria hosi eskola.

Biban ne’e, Diretór Servisu Edukasaun konsidera implementasaun serka sanitária afeta ba setór edukasaun, maibé parte ministériu fó flexibilidade data ezame ba munisípiu sira ne’ebé afetada implentasaun serka sanitária no konfinamentu obrigatóriu domisiliáriu.

Servisu Edukasaun munisipál rekomenda ba ministériu iha nasionál atu revee hikas kalendáriu  ensinu aprendizajen nasionál no pontu ezame.

“Ezame nasionál tuir loloos iha outubru, entaun ita rekomenda atu pelumenus revee ka implementa iha novembru ka dezembru,” nia hatutan.

Antes ne’e, Baucau suspende ona atividade aula prezensiál, nune’e daudaun ne’e profesór sira halo rezumu matéria no distribui ba estudante sira hodi estuda no bainhira la komprende sei konsulta direta ou liuhosi meiu komunikasaun.

Meiu seluk mak eskola iha uma ka online ne’ebé MEJD hahú implementa iha tinan 2020, maibé durante ne’e hetan protesta hosi sosiedade hotu katak la efetivu.

Aleinde ne’e, MEJD mós distribui ona rezumu matéria ba ensinu báziku 9 ano no ensinu sekundáriu jerál 12 ano atu prepara-an ba exame finál.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here