Komandante PNTL Munisípiu Dili, Superientendente Xefe Polisia, Henrique da Costa. Imajen Tatoli/Francisco Sony.

DILI, 28 setembru 2021 (TATOLI)—Polísia Nasionál Timor-Leste (PNTL), munisípiu Dili, detein suspeitu na’in-rua ho inisiál LG no ZB, tanba tuda rahun karreta patrullamentu Eskuadra Dom Aleixo.

Kazu-ne’e akontese iha domingu 26 setembru madrugada, bainhira mosu konfrontu entre joven iha aldeia Loro-Matan, suku Madohi, postu administrativu Dom Aleixo, munisípiu Dili.

Notísia relevante:PNTL lansa programa ‘kultura hadomi vida’

Bainhira ekipa patrullamentu hosi Dom Aleixo to’o iha fatin akontesimentu, iha grupu ida lori fatuk tuda hasoru hodi rezulta karreta  ida vidru bo’ot oin rahun totál.

“Polísia halo kedan atuasaun hodi detein suspeitu na’in-rua iha sela,” Komandante PNTL, munisípiu Dili, Superintendente Xefe, Henrique da Costa, hateten ba jornalista iha kna’ar fatin, Caicoli, tersa ne’e.

Kona-bá motivu hosi akontesimentu ne’e, sei iha hela investigasaun, bainhira kompleta oras 72  sei enkamiña ba Ministériu Públiku (MP) atu bele aprezenta ba primeiru interrogatóriu iha Tribunál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here