Komandu Jerál, Polísia Nasionál Timor-Leste (PNTL), lansa programa edukasaun sívika kona-bá ‘Kultura Hadomi Vida’ ba universidade-sira iha Timor-Leste (TL), Segunda (27/09/21). Imajen PNTL.

DILI, 27 setembru 2021 (TATOLI)—Komandu Jerál, Polísia Nasionál Timor-Leste (PNTL), lansa programa edukasaun sívika kona-bá ‘Kultura Hadomi Vida’ ba universidade-sira iha Timor-Leste (TL).

Komandante Operasaun Nasionál, Superitendente Xefe, Pedro Belo, hateten Komandu jerál PNTL serbisu hamutuk ho Diresaun Nasionál Transporte Terrestre (DNTT), Polísia Tránzitu Rodoviáriu, Polisiamentu Komunitária Nasionál, sei ba iha universidade-sira, hodi realiza programa ne’e atu bele fó formasaun ba estudante-sira ne’ebé hatene ona lori motór no karreta, tenke iha karta kondusaun.

Notísia relevante:Ema na’in-hitu mate tanba asidente tráfegu

“Lansamentu programa ne’e importante ba ita hotu,” Pedro Belo, hateten iha ámbitu lansamentu ne’ebé hala’o iha resintu Universidade da Paz (UNPAZ), Osindo Maleuana, segunda ne’e.

Komandu Jerál hala’o hela estudu ida, tanba tuir dadus PNTL, kada tinan ema lakon-vida hosi asidente tráfiku na’in 70 to’o 90, ho idade 10-30, tanba fatór umanu.

Rejista mós kanek no tohar iha asidente no identifika motorista balun laiha karta kondusaun. Iha parte seluk mós kona-bá krime, kada tinan rejista ema oho-malu 70-liu.

Nune’e, liu hosi estudu ida-ne’e, PNTL kria programa refere atu bele halo prevensaun ba asidente vida umanu.

PNTL sei fó formasaun dahuluk ba estudante UNPAZ na’in 30 ho matéria, kódigu estrada ho sira seluk, hodi kumprende didi’ak sinál tránzitu.

Tuir planu, estudante kada universidade sei partisipa formasaun durante loron haat, teoria loron rua no prátika loron rua hodi bele hetan karta kondusaun.

PNTL sei kontinua programa ida-ne’e ba tinan oin iha munisípiu sira hotu, ba joven no estudante ho komunidade hodi aumenta koñesimentu.

Nune’e mós Reitór UNPAZ, Adolmando Soares Amaral, agradese ba PNTL bele hamosu programa ne’e atu fó formasaun ba universidade-sira hotu, nune’e bele konsiensializa estudante no ema hotu atu utiliza transporte ho kuidadu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here