Komandante Polísia Unidade Tránzitu Munisípiu Dili, Inspetor Domingos Sarmento Gama. Imajen Tatoli/Francisco Sony.

DILI, 28 setembru 2021 (TATOLI)—Komandu Polísia Nasionál Timor-Leste (PNTL), munisípiu Dili, liuhosi Unidade Tránzitu, rejista ema na’in-rua mate tanba asidente tráfegu, iha loron 26 no 27 setembru tinan ne’e.

Tuir relatóriu polísia, kazu asidente ne’ebé akontese iha 26 setembru tuku 00:10 kalan otl, iha área Seroja Rai-Kotu, Comoro, motór Honda Supra X, matrikula J-2322 TL, kondús hosi FM no motór Honda Beat matrikula Q-5313 TL kondús hosi João Bosco Soares (26).

Notísia relevante:Ema na’in-hitu mate tanba asidente tráfegu

Motor rua ne’e mai hosi diresaun ida de’it rotunda Nicolau Lobato, atu ba Tasi-tolu no to’o mai iha área Seroja Rai-Kotu maka motor Honda Beat xoke motór Honda Supra hosi kotuk.

Iha akontesimentu ne’e, motorista João Bosco Soares, hetan kanek todan iha parte ulun fatuk, kakorok no kanek tan iha knotak ho liman loos no vítima transporte kedan ba iha Ospitál Nasionál Guido Valedares (HNGV,siglá portugés), hodi hala’o tratamentu, maibé hafoin ne’e la konsege salva vida.

Nune’e mós kazu asidente ida seluk akontese iha 27 setembru tuku 04:50 otl dader, matebian José da Silva, kondús motór Honda Beat P.7363 TL, bainhira hala’o viajen hosi Vemase mai Dili to’o iha área Metinaro, xoke karreta Mitsubisi fuso A.53-223 hosi kotuk, rezulta mate-fatin no karreta ne’e hala’o mós viajen hosi Viqueque mai Dili.

“Asidente iha Metinaro, tuir kronolojia karreta ne’e para hela iha estrada ibun no kondutór tun hodi soe bee. Nune’e, vítima halai lakon kontrollu hodi xoke hosi kotuk,” Komandante PNTL, Tránzitu munisípiu Dili, Inspetór, Domingos Gama, hateten ba jornalista iha kna’ar fatin, Caicoli, tersa ne’e.

Polísia rekolla ona informasaun no evidénsia hanesan karreta ho motór hodi mai iha komandu atu loke hela prosesu investigasaun ba suspeitu no sasin, atu lori ba Ministériu Públiku (PM), nune’e bele aprezenta ba Tribunál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here