PNTL Munisípiu Dili liuhosi Unidade Seksaun Tránzitu no Rodoviáriu, hala’o apreensaun ba motorizada ne'ebé estasiona kontra kóndigu estrada, iha área Audian, tersa (24/08). Imajen Tatoli/Francisco Sony.

DILI, 07 setembru 2021 (TATOLI)—Durante iha fulan agostu, Polísia Nasionál Timor-Leste (PNTL), liuhosi Departamentu Tránzitu Rodoviáriu Nasionál, rejista ema na’in-hitu mate tanba asidente tráfegu.

Komandante Tránzitu Nasionál, Superintendente, João Belo dos Reis, fó-sai katak, kazu asidente tráfegu ne’ebé rejistadu hamutuk 115  iha territóriu, rezulta kanek todan 16, kanek kaman 133 ho tipu asidente karreta xoke-malu, motór ho motór, karreta ho motór, karreta ho motór monu rasik.

Notísia relevante:Agostu, Polísia Tránzitu nasionál rekolla $39.279

“Hosi asidente ne’e, kauza ema na’in hitu mate,” João Belo dos Reis  hateten ba jornalista-sira liuhosi konferénsia imprensa, iha edifísiu Komandu Jerál PNTL, Caicoli, tersa ne’e.

Tuir identifikasaun polísia, asidente mosu tanba fatór umanu kontribui 90% no nota asidente sira ne’e domina okupa primeiru maka hosi motór ho marka beat hamutuk 56.

Tanba ne’e,  fó-hanoin nafatin ba populasaun bainhira utiliza transporte motorizada sira tenke uza kapasete hodi salva vida, tanba maioria movimentu asidente bainhira mosu kauza ba ulun.

Husu ba inan-aman atu labele fó motór no karreta ba oan sira ne’ebé idade sei kiik, tanba konsiénsia atu uza estrada públiku, sinál no kódigu estrada seidauk iha, nune’e perigu ba asidente.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here