Diretór MSSI Munisípiu Covalima, Agapito Asis. Imajen Tatoli/Celestina Teles

COVALIMA, 28 Setembru 2021 (TATOLI)—Diretòr Ministériu Solidariedade Sosiál no Inkluzaun (MSSI) Covalima, Agapito Asis, informa ekipa pagamentu hosi MSSI no Banku Nasionál Komersiu Timor-Leste (BNCTL) seidauk finaliza pagamentu subsídiu ba benefisiáriu Bolsa da Mãe iha Covalima.

Notísia Relevante: Governu sei halo pagamentu benefisiáriu Bolsa da Mãe

Agapito Asis hateten, bazea ba kalendáriu ne’ebè fó sai hosi BNCTL katak pagamentu subsídiu ba benefisáriu Bolsa da Mãe ne’e hahú hala’o iha 20 setembru ne’e no sei ramata iha 27 outubru tinan 2021.

“Prosesu pagamentu ba benefisiáriu Bolsa da Mãe la’o hela bazea ba oráriu ne’ebè fó sai hosi BNCTL. Ami halo hela monitorizasaun maibé atu halo pagamentu ne’e kompeténsia BNCTL ni’an. BNCTL seidauk finaliza pagamentu tanba pagamentu foin hahu iha loron 20 fulan setembru tinan ne’e,” Agapito Asis informa ba Ajensia Tatoli iha nia kna’ar fatin, tersa ne’e.  

Xefe Suku Suai Loro, Martinho Mendonça, hateten Governu liuhosi Ministériu Solidariedade Sosiál no Inkluzaun (MSSI) hamutuk ho BNCTL seidauk halo pagamentu ba benefisiáriu Bolsa da Mãe iha suku ne’ebé nia lidera tanba bazea ba kalendáriu. 

“Ami iha ona lista benefisiáriu maibé bazeea ba oráriu BNCTL nian sei halo pagamentu subsídiu ba benefisiáriu Bolsa da Mãe iha suku Suai Loro hahu iha loron 21 fulan outubru tinan ne’e,” nia dehan.

Suku Suai loro kompostu hosi aldeia, Loro, Lo’o Mane Ikun, Sukabilaran ho Akar Laran ho total benefisiáriu ne’ebè benefisia ba subsídiu Bolsa da Mãe hamutuk 283. 

Dadus hosi MSSI Covalima hatudu katak hosi Postu Administrativu Fatulilic, Fatumean, Fohorem, Maukatar, Suai, Tilomar no Zumalai ho suku hamutuk 30 ne’e, totál benefisiáriu ba Bolsa da Mãe hamutuk 3,995.

Jornalista : Celestina Teles

Editór       : Cancio Ximenes

HAKEREK NO HATÁN

Please enter your comment!
Please enter your name here