Diretór Fundasaun Ahisaun, Domingos dos Santos. Imajen TATOLI/Nelia Fernandes.

DILI, 27 setembru 2021 (TATOLI)—Sekretária Estadu Formasaun Profisionál no Empregu (SEFOPE), tinan ne’e apoia $11.000 ba Fundasaun Ahisaun hodi halo reabilitasaun ba fatin formasaun iha Munisípiu Manufahi, Suku Betano, Aldeia Seli Hasan.

Notísia Relevante: Fundasaun Ahisaun kapasita ema ho defisiénsia iha área artezenatu

“Iha tinan ida-ne’e, SEFOPE fó apoiu fundu $11.000 hodi bele halo reabilitasaun ba fatin formasaun ne’e, tanbá ita iha membru ema defisiénsia hamutuk 30 mak iha ne’ebá. Depois fatin ne’e ita finaliza, ita sei halo formasaun ba itania maluk sira ho defisiénsia ne’ebé mak hela iha ne’ebá,” Diretór Fundasaun Ahisaun, Domingos dos Santos, hateten ba Agência Tatoli, iha nia knaarfatin, Dili, segunda ne’e.

Razaun halo reabilitasaun fatin ne’e, tanba iha tinan 2016 ne’e Fundasaun Ahisaun halo ona, maibé ho fundu ne’ebé limitadu entaun paradu tiha no labele la’o durante tinan hirak nia laran, nune’e liuhosi proposál ne’ebé Fundasaun Ahisaun submete ba SEFOPE entaun SEFOPE aseita hodi apoia.

Fundus ne’ebé SEFOPE apoia ho totál $11,000 ne’e, Fundasaun Ahisaun sei utiliza hodi halo reabilitasaun ba fatin formasaun no instalasaun ba eletrisidade inklui haris fatin.

“Reabilitasaun ne’e, ita hahú iha fulan ida-ne’e. Ba dahuluk, ita halo instalasaun ba eletrisidade no daruak mak ita foin hahú hola materiál, hafoin ne’e ita bele ba hahú halo ona reabilitasaun ba fatin formasaun ne’ebá,” nia dehan.

Nune’e, Nia infroma, bainhira reabilitasaun ba fatin formasaun ne’e remata mak Fundasaun Ahisaun sei halo formasaun konabá suku roipa, komputadór, no artezenatu, ho nune’e ema ho defisiénsia sira-ne’e bele iha koñesimentu ba iha área hirak ne’e.

“Ema ho defisiénsia ne’ebé tuir ona formasaun iha ne’e, ema sira-ne’e mak sei hanorin filafali ba itania maluk sira iha ne’ebá. Tanba, durante ne’e ita fó ona formasaun ba itania maluk ho defisiénsia sira-ne’e no bainhira reabilitasaun ne’e hotu, sira rasik mak sei jere iha ne’ebá,” nia dehan.

Tuir planu sei reabilta sala rua no hosi sala rua ne’e, ida sei uza ba fatin formasaun no ida seluk sei sai mós fatin dormitóriu ba ema ho defisiénsia sira atu hela iha ne’eba.

Entretantu, totál ema defisiénsia ne’ebé dadaun iha Munisípiu Manufahi, Suku Betano, Aldeia Seli Hasan, hamutuk 30, kompostu hosi Feto na’in10 no mane na’in20.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here