Defisiénsia sira hatudu kreatividade liu hosi obra artezenatu ne'ebé sira produs durante iha feira iha komemorasaun loron mundiál ba ema ho defisiensia iha sentru konvensaun dili. Imajen/ Nelson Sousa

DILI, 23 setembru 2021 (TATOLI)—Diretór Fundasaun Ahisaun, Domingos dos Santos, informa, durante ne’e Fundasaun Ahisaun fó formasaun hodi kapasita ema defisiénsia fiziku na’in-neen (6) iha área artezenatu.

Notísia Relevante: Fundasaun Ahisaun fó apoiu umanitáriu ba ema defisiénsia 200-resin

“Aminia formasaun ne’e atu promove sirania abilidade (skill) ne’ebé mak iha no kria rendimentu ba sirania aan rasik. Tanba buat sira-ne’ebé mak sira halo, sira bele faan filafali liuhosi ezibisaun ruma, nune’e bele sustenta sirania aan rasik,” Domingos dos Santos hateten ba Agência Tatoli, iha nia knaarfatin, Dili, kinta ne’e.

Iha formasaun ne’e, Fundasaun Ahisaun halibur matéria tutoriál sira kona-bá artezenatu nian hosi youtube hodi aprezenta ba partisipante sira kona-bá oinsá habahat ahi, hafoin ne’e parrtsipante sira halo no banati tuir hodi prátika daudaun.

Partisipante na’in-neen (6) ne’ebé mesak mane ne’e, durante ne’e prodús ona mak sira bele bahat (ukir) ai sai filafali ba kuatru retratu nian, bahat lafaek, ikan, aifunan no sira mós bele prodús vazu ba aifunan ho materia prima hosi raihenek tasi no fatuk.

Liuhosi kreatividade prodús vazu aifunan ne’e, sira lori ba faan fali ho nia folin tuir medida ne’ebé iha no medida ne’ebé kiik ho folin $5 no boot $20, enkuantu obra bahat ai sira-ne’e bele faan ho folin $1 to’o $100.

Formadór área arte zenatu iha Fundasaun Ahisaun, José Frederico de Sousa, hateten durante hala’o formasaun ba artezenatu ne’e, laiha teoria maibé prátika mak barak.

“Ami laiha matéria eskrita maibé ami ba direta halo prátika, nune’e bele forma sira bele kaer rasik no hatene lalais,” nia dehan.

Fundasaun Ahisaun harii iha tinan 2000 ho objetivu oinsa atu bele tau matan ba ema ho defisiénsia sira-ne’ebé mak moris vulneravél hamosu deskriminasaun hosi komunidade, tanba ne’e fundasaun ida ne’e eziste atu bele tau matan ba ema ho defisiénsia ne’e.

Hosi 2014 to’o 2021, ema ho defisiénsia fiziku ne’ebé tuir formasaun iha Fundasaun Ahisaun hamutuk 140 no hosi númeru ne’e iha na’in29 mak hetan ona servisu iha Instituisaun Governu no Privadu sira.

Totál funsionáriu no formadór iha Fundasaun Ahisaun hamutuk 11 no formandu sira mai hosi Munisípiu 12 inklui Rejiaun Administrativa Espesiál Oé-Cusse Ambeno (RAEOA).

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here