Saudozu Ma’Hudo Raan Kadalak (hamriik) no saudozu Ma’Huno Bulerek Karathayano (tuur). Imajen/Espesiál.

DILI, 23 setembru 2021 (TATOLI)–Prezidente Konsellu Kombatente Libertasaun Nasionál, Vidal de Jesus “Riak Leman”, hateten José António da Costa Ma’Huno Bulerek Karathayano fó kontribuisaun boot tebes iha tempu rezisténsia no enkoraja mós membru FALINTIL kontinua reziste hasoru inimigu.

Notísia Relevante: Lere konsidera Saudozu Ma’Huno hadomi duni TL

Riak Leman fó sasin katak, hafoin baze apoiu rahun, membru Komité Sentrál FRETILIN (CCF, sigla portugés) ne’ebé mak moris hela no halo funu iha rai-laran ne’e mak Xanana Gusmão no Ma’Huno Bulerek Karathayano.

Riak Leman mós la’o hamutuk ho Ma’huno dezde baze apoiu rahun to’o 1999, ne’ebé reprezenta FALINTIL iha KPS, Ma’huno no Ma’hudo mak reprezenta rezisténsia no Leandro Isaac mak reprezenta CNRT (Conselho Nacional Resistência Timorense) iha Komisi Perdamaian dan Stabilitas (KPS) iha implememtasaun Konsulta Populár 1999 ne’e.

Nia dehan, saudozu Ma’huno mak komanda operasaun levantamentu 1982 iha Dare no lidera operasaun ida Mane-Haat, Soibada ne’ebé konsege hasai kilat ualu (8).

Iha mometu ne’e kaer tiha nai lulik ida naran Mateus iha Mane-Haat no oho forsa Indonézia nian ne’ebá hodi hasai kilat ualu (8) ne’e, no parte Forsa Armada nian ema na’in-rua (2) mak mate.

Komandante Ma’Huno (klaran) no Saudozu Ma’Hudo Raan Kadalak tuur hamutuk no konversa ho Komandu Luta Nian, Kay Rala Xanana Gusmão, hodi trasa Timor-Leste nia ukun rasik-aan. Imajen/Espesiál.

“Saudozu Ma’Huno ne’e nu’udar ema ida-ne’ebé ajitadór. Nia atu ajita de’it ne’e, liu fali Maun Boot Kay Rala Xanana Gusmão no Ma’Hudo Raan Kadalak sira-ne’e, nia liu hotu. Nia kuandu ajita ne’e ita-nia isin-fulun hamriik no ohin ne’e ita barani matak de’it. Tanba ha’u asiste nia ajitasaun iha levantamentu 1982 iha Kablaki nia tutun ne’e, ha’u mós isin-fulun hamriik. Nia ko’alia ne’e, ita sente ukun-aan besik hela ona. Mate mós ita lata’uk,” Prezidente Konsellu Kombatente Libertasaun Nasionál ne’e informa ba Agência TATOLI, liuhosi telefónika, segunda ne’e.

Tanba tuir nia, Ma’Huno ema-ida-ne’ebé inspiradór ba membru FALINTIL sira iha funu laran no fó korajen ba membru FALINTIL sira atu labele lakon esperansa, maibé timor-oan tenke luta nafatin to’o hetan vitória.

Tanba Ma’uhuno hanoin katak Povu Timor-Leste labele kontinua terus ba inimigu sira-nia rejime entaun FALINTIL tenke luta nafatin iha ai-laran.

Notísia Relevante: Parlamentu Nasionál aprova votu pezár ba saudozu Ma’Huno

Nia dehan, hafoin baze apoiu rahun, FALINTIL izoladu hela durante tinan rua (2) nia laran, Xanana Gusmão hamutuk no Ma’Huno hodi halo reuniaun no reorganiza fali Forsa Armada, reorganiza kuadru sira, reorganiza membru CCF, ne’e mak hodi kobre Timor laran tomak, hodi kontinua reziste hasoru inimigu.

“Ho Ma’Huno Bulerek Karathayano nia mate ne’e halo ita hotu triste. Hanesan todan ida rai hela ba ita, liuliu ba veteranu sira, ita lakon ema di’ak ida,” nia hateten.

Prezidente Konsellu Veteranu ne’e fó ona orientasaun ba konsellu munisipál sira atu hasa’e Bandeira meia haste (bandeira dada to’o riin klaran) no husu misa ba saudozu José António da Costa Ma’hunu Bulerek Karathayano nia mate.

Prezidente Konsellu Veteranu ne’e labele partisipa serimónia atu haloot saudozu Ma’Huno Bulerek Karathayano, tanba halo hela verifikasaun ba dadus veteranu iha munisípiu sira.

Notísia Relevante: “Biar ha’u moras, Ma’Hudo lakon maibé Timor-Leste ukun-an ona”

Jornalista : Evaristo Soares Martins

Editór       : Cancio Ximenes   

HAKEREK NO HATÁN

Please enter your comment!
Please enter your name here