Ministru Transporte no Komunikasaun (MTK), José Agostinho da Silva, no Ministru Koordenadór Asuntu Ekonomia (MKAE), Joaquim Amaral, hasai foto hamutuk, hafoin lansamentu kampaña nasionál vasina kontra COVID-19 iha munisípiu Viqueque. Imajen Tatoli/Vitorino Lopes da Costa.

VIQUEQUE, 27 setembru 2021 (TATOLI)—Ministru Transporte no Komunikasaun (MTK), José Agostinho da Silva, hamutuk ho Ministru Koordenadór Asuntu Ekonomia (MKAE), Joaquim Amaral, lansa kampaña nasionál vasina kontra COVID-19 iha munisípiu Viqueque.

Ministru Joaquim Amaral, hateten, Governu sentrál deside hodi reforsa tán serbisu vasinasaun iha munisípiu Viqueque, nune’e hakarak agradese ba ekipa vasinasaun iha ne’ebé durante ne’e hala’o vasina ho rezultadu ne’ebé di’ak.

Notísia relevante:Vasina iha Viqueque atinje 62%

“Membru Governu hamutuk ho imi atu hala’o kampaña nasionál ba programa vasina iha Viqueque. Ami-nia prezensa la’ós terinetik ekipa serbisu iha munisípiu ne’e, maibé ita hamutuk hodi aselera prosesu vasina no ekipa sei integra iha ne’e, durante loron ualu hodi hala’o kampaña,” Joaqim Amaral, hateten iha serimónia lansamentu kampaña nasionál vasina, iha salaun munisípiu Viqueque, segunda ne’e.

Kona-bá estoke ai-moruk vasina ne’ebé iha, presija aselera tanba ne’e maka membru Governu-sira tun direta mai munisípiu.

“Ita-nia estoke vasina ne’ebé iha, ita hetan hosi doadór-sira. Bainhira ita hetan doasaun mak la uza ho di’ak, entaun bainhira ita monu fali ba susar doadór-sira sei la apoia tán ita,” Joaquim Amaral dehan.

Governu konsiente katak, hosi kampaña ne’e sei hasoru dezafiu oioin liuliu ba kona-bá dezinformasaun sira kona-bá programa vasina, maibé Governu afirma katak, komisaun sira iha munisípiu sei la la’o mesak tanba Governu sei hamutuk ho komisaun-sira.

Nia mós hato’o felisitasaun ba  Munisípiu Viqueque ne’ebé ninia progressu vasinasaun ba atinjimentu di’ak tebes.

Iha fatin hanesan, Prezidente Sentru Integradu Jestaun Krize (SIJK) munisipál, atuál administradór munisípiu Viqueque, Januário Soares ‘Bolly’ espera katak, ho prezensa membru Governu-sira sei bele motiva di’ak liu tan kmunidade hodi simu vasina.

Tuir dadus atinjimentu vasina doze dahuluk iha Viqueque hamutuk 28.132 ho 64% no vasina doze daruak hamutuk 14.964 atinjimentu to’o 53%.

Partisipa iha serimónia lansamentu kampaña vasina ne’e, diretór serbisu saúde munisípiu, autoridade lokál-sira.

Kampaña iha loron dahuluk ne’e, MTK realiza kampaña iha postu administrativu Ossu no MKAE hala’o kampaña iha postu administrativu Viqueque Villa.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here