Ekipa liña frente iha Munisípiu Viqueque, hahú simu vasina AstraZeneca doze daruak, segunda (14/06/2021). Imajen Tatoli/Vitorino Lopes da Costa.

VIQUEQUE, 09 setembru 2021 (TATOLI)—Rezultadu vasina kontra COVID-19 ho tipu AstraZeneca doze dahuluk no daruak iha munisípiu Viqueque, to’o 09 Setembru 2021, iha ema na’in 30.000 mak simu ona ho nia atinjimentu 62%.

“Atinjimentu to’o ona 62%.  Husu komunidade ne’ebé seidauk simu vasina, hakbesik-an ba sentru saúde hodi vasina,” Diretór Serbisu Saúde munisípiu Viqueque, Francisco de Carvalho, hateten ba jornalista, iha postu saúde Viqueque Villa, kinta ne’e.

Notísia relevante:COVID-19, mate rua no ativu 3.523

Parte serbisu saúde no parseiru-sira iha munisípiu Viqueque, kontinua hala’o kampaña vasina, hodi hadi’a konsiénsia komunidade, atu mai simu vasina.

Serbisu Saúde munisipál mós apela nafatin ba populasaun iha munisípiu ne’e atu respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira ne’e mak hanesan uza máscara, fase liman beibeik ho sabaun ka dezinfetante ruma, evita kose liman ba matan, inus ho ibun  bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak  hamri’ik ka tur do’ok husi ema seluk, mínimu metru ida ho balun.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here