Foos hosi armazen CLN. Imajen TATOLI/Egas Cristóvão.

COVALIMA, 27 setembru 2021 (TATOLI)–Ministériu Solidaridade Sosiál  no Inkluzaun (MSSI) hamutuk ho Aministrasaun munisipál, fahe foos saka 263 ba família vulnerável no ema ho difisiénsia, iha suku Suai Loro, postu administrativu Suai villa, munisípiu Covalima.

“Apoiu ne’e, ita fó orientasaun ba xefe suku hodi halo levantamentu dadus ba família vulnerável no ema ho difisiensia ne’ebé labele asesu ba merkadu,” Administradór Covalima, Francisco de Araújo, hateten, iha  suku Suai Loro, segunda ne’e.

Notísia relevante: Governu transporta ona foos saka 1.000 ba Covalima

Distribuisaun ne’e bazeia ba pedidu autoridade lokál ba parte MSSI, ne’ebé foos hirak ne’e foti iha armazen Sentru Lojíztika Nasionál (CLN), ne’ebé antes ne’e prevee ba situasaun emerjénsia.

Nune’e, Administradór husu ba benefisiáriu, bainhira simu ona foos labele haree liu ba valór, maibé oinsa bele responde problema menus ai-han iha uma-laran. 

“Prosesu distribui foos ba família vulnerável bazeia ba pedidu ne’ebé haruka hosi autoridade ne’ebé identifika família vulnerável,” nia akresenta. 

Programa ministériu ba faze dahuluk, distribui ona foos ba família vulnerável iha suku sira ne’ebé pertense ba munisípiu Covalima, maibé MSSI mos la taka dalan mós ba autoridade lokál, ne’ebé sei identifika família sira ne’ebé laiha ai-han.

Iha biban hanesan, Xefe suku Suai Loro, Martinho Mendonça, hateten, distribuisaun foos iha iha aldeia Loro, mane-ikun, Lo’o, sakabilaran no akar-laran, suku Suai Loro, postu administrativu Suai villa.

Família vulnerável iha aldeia Akar-laran, Laura de Andrade, kontente hafoin simu foos hosi MSSI.

“Ami kontente Governu bele distribui ona foos hodi bele responde netik ami-nia difikuldade ne’ebé ami entrenta menus ai-han,” Laura hatutan. 

Jornalista : Celestina Teles

Editora      : Julia Chatarina

HAKEREK NO HATÁN

Please enter your comment!
Please enter your name here