Foos hosi Governu sentrál hatún iha armazen MSSI Covalima. Imajen/MSSI

DILI, 10 marsu 2021 (TATOLI)--Governu liuhosi Ministériu Koordenadór Asuntu Ekonómiku (MKAE) no Ministériu Turizmu, Komérsiu no Indústria (MTKI), koopera ho Sentu Lojístika Nasionál (CLN, sigla portugés) transporta ona foos ba munisípiu Covalima.

“Ohin ita hatún ona foos saka 1.000 iha munisípiu Covalima atu halo intervesaun merkadu no apoia umanitária. Ida-ne’e hanesan atuasaun Governu nia atu normaliza folin foos iha merkadu,” Ministru Turizmu, Komérsiu no Indústria, José Lucas da Carmo da Silva, informa hafoin reuniaun Konsellu Ministru iha edifísiu Ministériu Finansa, Aitarak-Laran, kuarta ne’e.

Apoia umanitária no intervesaun merkadu hodi normaliza folin foos tanba impoin serka sanitária iha munisípiu Covalima, maibé daudaun termina ona, exetu iha postu administrativu Fatumean.

Notísia relevante: Foos saka 680 ba komunidade iha Fatumean la sufisiente

Kona-ba intervesaun merkadu munisípiu Dili, Tuir Ministru presiza buka hatene dadus atu iha nesesidade halo intervensaun hamutuk ho endetidade hotu, inklui setór privadu atu halo jestaun didi’ak hodi folin foos labele sa’e.

Hafoin impoin serka sanitária iha munisípiu Dili, MTKI konvoka enkontru urjente ho empreza importadór foos sira atu  hamutuk haree ba kestaun ekonomia rai-laran.

“Ita atu dehan loloos karik foos iha armazen Governu tonelada 25.000 no hafoin diskusaun ho importadór foos sira katak iha sira-nia armazen tonelada 18.000 no agora foos iha dalan atu mai purvolta tonelada 14.000,” governante ne’e akresenta.

Nune’e, nia husu ba empreza sira, liuliu loja fa’an tutan atu labele hasa’e folin foos, maibé tenke tuir regulamentu nian.

“Ita iha Autoridade Inspesaun Fiskalizasaun  Atividade Sanitária no Alimentár (AIFAESA) ne’ebé halo kooperasaun ho Polísia Nasionál Timor-Leste (PNTL), atu haree no fó hanoin ba malu atu labele hasa’e folin foos iha merkadu iha situasaun ne’e,” nia akresenta.

Daudaun ne’e, kompañia Alva-Lili nia stock foos iha armazen tonelada 500 no iha tonelada 1.000 to’o 1.500 sei tama iha semana ida-ne’e.

Kompañia distribuitór Perisos nian  foos iha  tonelada 6.800, sobu ona iha portu no fulan oin sei tama tan tonelada  8.600.

Kompañia Lisun  iha stock foos tonelada 700, ne’ebé prepara ba programa Cesta Bázika no prepera atu hatama tan tonelada 5.000.

Entretantu, kompañia Supermerkadu hanesan W-four, Dili Mart, Timor-Top no Start King nia produtu ho folin normál.

Nune’e mós, nessesidade bazika ne’ebé importa mai mós la’o ho di’ak hela tanba impaktu hosi kompañia kontribuitór selu kustu transportasaun ho ró, tanba ne’e hasa’e folin la liu 10% tuir lei ne’ebé vigora ona.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here