Ema ho Defisiénsia hatudu talentu iha área desportu iha komemorasaun loron mundiál ba Ema ho Defisiénsia ne’ebé hala’o iha Palásiu Prezidente Nicolau Lobato. Imajen/Mídia PR.

DILI, 27 setembru 2021 (TATOLI)—Diretór Fundasaun Ahisaun, Domingos dos Santos,   informa iha 2021 ne’e Fundasaun Ahisaun apoia Ema ho Defisiénsia (EhD) hamutuk na’inneen ne’ebé daudaun ne’e hala’o hela estudu iha ensinu superiór. 

Dimingos dos Santos hateten, ema hirak ne’e daudun ne’e eskola hela iha Institute of Bussines (IOB), Universidade Nasionál Timor Lorosa’e (UNTL) no Universidade da Paz (UNPAZ).

Notísia Relevante: SEFOPE apoia $11.000 ba Fundasaun Ahisaun

“Ema ho Defisiénsia na’inneen ne’e kompostu hosi feto na’inhaat (4) no mane na’in-rua (2). Sira hirak ne’e, daudaun ne’e balun hala’o estudu to’o ona iha semestre tolu no balun atu ba semestre lima ona,” Domingos dos Santos, hateten ba Agência Tatoli, iha nia knaarfatin, Dili, segunda ne’e.

Ho númeru ne’e, nia informa, hosi tinan 2015 to’o 2020 ne’e, Fundasaun Ahisaun mós apoia ona ema ho defisiénsia hamutuk na’in22 ne’ebé mak hala’o sira-nia estudu iha ensinu superiór.

“Ema na’in22 ne’e, iha na’in11 mak gradua ona no na’in haat (4) agora sei finalista no na’in-hitu (7) seluk sei iha prosesu aprendizajen,” nia dehan.

Hosi ema 22 ne’e, iha na’in11 mak hetan ona servisu no agora balun servisu ona iha Instituisaun Governu, Instituisaun Privada, Fundasaun Ahisaun, inklui servisu iha Organizasaun hanesan Raes Hadomi Timor Oan (RAES) no Asosiasaun Defisiénte TimorLeste (ADTL) ho pozisaun hanesan Xefe Departamentu, Jestór Programa, Koordenadór Programa, no balun servisu iha área Finansa.

Fundasaun Ahisaun apoia ema ho defisiénsia sira-ne’e tanba hetan tulun hosi parseiru Friends of Ermera hosi Australia ne’ebé mak apoia ema ho defisiénsia hodi bele asesu ba iha ensinu superiór.

“Apoiu ne’e, depende ba númeru ne’ebé mak Friends of Ermera apoia. Ezemplu, kada tinan ida sira apoia ema na’in hira no nia durasaun ne’e sira fó trajetu. Hanesan tinan ida, iha 2015 sira apoia ema na’in11, sira ne’e hotu tiha mak sira foin kontinua apoia fali. Entaun, sira-ne’ebé hahú iha 2015 iha tinan 2020 sira-ne’e tenke remata ona estudu, hafoin ne’e mak iha tinan 2021 sira foin apoia filafali ba sira seluk,” nia dehan.

Diretór ne’e akresenta, maneira hosi apoia ne’e Fundasaun Ahisaun halo identifikasaun ba ema defisiénsia sira-ne’ebé mak hakarak tebes atu kontinua estudu iha universidade, hafoin ne’e Fundasaun Ahisaun foti dadus no halo pedidu hodi submete ba Friends of Ermera.

Entretantu, tuir dadus Fundasaun Ahisaun, hosi tinan 2015 to’o 2021 ema ho defisiénsia iha TimorLeste hamutuk500.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here