Kuadru partidu CNRT, akompaña ho família Saudozu Ma’huno, presta omenajen iha sede Bairro dos Grilos, domingu (26/09). Imajen TATOLI/Florêncio Miranda Ximenes

DILI, 26 setembru 2021 (TATOLI)—Kuadru partidu Congresso Nacional de Reconstrução de Timorense (CNRT) presta omenajen ikus ba funu-na’in José Antonio Da Costa ‘Ma’Huno Bulerek Karathayano’, iha sede Bairro dos Grilos.

“Ohin, ha’u lakon tan ha’u-nia Alin ida! Ma’Huno Bulerek Karatayno, hamutuk ho ha’u, maka sobrevivente hosi Komité Sentrál FRETILIN, hosi kedas tinan 1980, ne’ebé re-organiza fali rezisténsia Armada, iha I Konferénsia Nasionál, ne’ebé hala’o iha marsu 1981, iha Laline,” Mensajen Prezidente CNRT, Kay Rala Xanana Gusmão, ne’ebé lee hosi Vise-Prezidente, Virgílio Smith iha, sede CNRT, domingu ne’e.

Notísia relevante: Kuadru partidu FRETILIN presta omenajen ho tristeza ba Saudozu Ma’Huno

Iha mensajen omenajen, Xanana konta tuir, iha konferénsia nasionál dahuluk FRETILIN, sira na’in-rua (Xanana no Ma’Huno) orienta kuadru-sira ne’ebé partisipa iha konfénsia hodi eleje fali membru Komité Sentrál FRETILIN foun, hanesan Nino Konis Santana, Bere Malay Laka no seluk ne’ebé mate iha funu-laran, iha kedas setembru 1981, iha operasaun Kikis, ne’ebé inimigu hala’o iha Rejiaun Sentrál.

Aleinde ne’e, Lere Anan Timur eleitu hanesan membru CCF no sai Komisáriu Polítiku iha Rejiaun Haksolok/Fronteira Súl no iha tinan 1984, sai hosi kuadru polítiku hodi asume kargu hanesan Komandante.

“Iha Laline, estrutura funu nian mak Conselho revolucionário da Resistência Nacional (CRRN). Iha fali tinan 1986, iha re-organizasaun foun, ho naran Conselho Nacional da Resistência Maubere (CNRM) no iha konsellu ne’e, Komisáriu Polítiku no membru hanesan Ma’Huno, Mau Hodu ho Nino Konis Santana” Xanana haktuir liuhosi mensajen eskrita.

Tuir Xanana, ohin loron, membru CCF hosi jerasaun 1981 hela de’it ona Komandante Lere.

“Hosi fali jerasaun CCF tinan 1975, ne’ebé la rende no sei moris maka ami na’in-rua, Ma’Huno no ha’u rasik. Maibé, ohin, Má’Huno liu tiha ona,” Xanana hatutan.

Nia dehan, iha tinan 1999, nia kompañeiru Ma’Huno hetan stroke no terus, ne’ebé ho moras ida-ne’e to’o ohin loron mak hakotu iis.

“Nu’udar Prezidente Partidu CNRT, hodi partidu tomak, kuadru no militante sira-nia naran, ha’u hakarak presta ami-nia onra ba fundadór ida partidu CNRT. Nune’e mós, nu’udar Prezidente partidu CNRT no nu’udar pesoál, hato’o sentidu pézames ba kompañeira Teresinha Viegas no ba família tomak hosi kompañeiru Ma’Huno Bulerek Karatayano nian. Maromak simu hela nia iha ninia kadunan santo, hodi husu mós atu Má’Huno bele tau matan no akompaña ita hotu iha situasaun difísil ne’e,” Xanana fó omenajen.

Saudosu Ma’Huno, nu’udar Vise-Prezidente I, hamutuk ho Kay Rala Xanana Gusmão funda partidu CNRT iha tinan 2007.

Hafoin fó omenajen iha sede CNRT, família Saudosu Ma’Huno entrega mate-isin ba Estadu  iha Muzeu Rezisnténsia hodi rai hahú hosi loron 26 to’o 28 setembru, no iha loron 28 setembru dadeer, sai hosi Muzeu Rezisténsia ba Igreja katedrál hodi halo Misa Requiem.

Hafoin misa, Estadu sei entrega mate-isin ba família hodi halo seremónia kulturál iha uma-lisan iha Laleia, Manatuto, hafoin entrega hikas ba Estadu atu kontinua halo seremonia funebre iha Metinaro.

Funu-na’in Ma’huno hakotu iis iha Hospital Nasional Guido Valarades (HNGV), iha sesta (24/09), tuku 17:30 otl, tanba hetan atakasaun iha kurasaun.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here