Kuadru Partidu FRETILIN no família Saudozu Ma’Huno presta omenajen ikus iha CCF, Comoro, domingu (26/09). Imajen TATOLI/Florêncio Miranda Ximenes

DILI, 26 setembru 2021 (TATOLI)—Kuadru Partidu Frente Revolusionária Timor-Leste Independente (FRETILIN) presta omenajen ho triste ba Saudozu José Antonio Da Costa ‘Ma’Huno Bulerek Karathayano’.

Sekretáriu Jerál FRETILIN, Marí Alkatiri, ho triste, hateten, maski lakon saudozu maibé nia obra sei nafatin hela nafatin.

“Ma’Hunu nia klamar fila-hikas ba Maromak no ita hotu hein katak Maromak simu iha nia kadunan santu ho vida interna, loron ruma ita bele hasoru malu fali. Maibé Ma’Huno nia memória, nia obra, nia luta, hahú hosi uma ida-ne’e no sei hela iha uma ida-ne’e. Hakarak ka lakohi ne’e mak realidade,” Sekretáriu Jerál FRETILIN dehan iha Komité Sentrál FRETILIN (CCF, sigla portugés) Comoro, domingu ne’e.

Notísia relevante: Partidu FRETILIN no CNRT sei presta omenajen ba Saudozu Ma’Huno

Tuir Alkatiri, Saudozu Ma’Huno hola parte iha CCF desde inísiu to’o independénsia.

“Nia halo parte iha uma ida-ne’e no nia obra hosi partidu ida-ne’e mak sei hela no ami. Ida-ne’e mak sei hela ba povu tomak, ida-ne’e mak sei lori ba oin, to’o aban bainrua, ami kumpre ona devér ne’ebé Ma’huno husik hela mai ami,” Mari Alkatiri ho tanis hato’o liafuan ikus.

Mate-isin sai hosi CCF liu ba sede CNRT iha Bairro dos Grilos, hafoin sei entrega ba Estadu iha Muzeu Rezisténsia.

Saudozu Ma’Huno nu’udar antigu Komandante FALINTIL, antigu Sekretáriu Komisaun Diretiva FRETILIN no atuál Primeiru Vise-Prezidente Partidu CNRT.

Ma’huno Bulerek Karathayano, moris iha 14 abríl 1949, hanesan mós Komandante FALINTIL ida ne’ebé la’o hamutuk Komandante ein Xefe, Kay Rala Xanana Gusmão, dezde 1975 to’o 1999.

Jornalista : Evaristo Soares Martins

Editora      : Julia Chatarina

HAKEREK NO HATÁN

Please enter your comment!
Please enter your name here