José António Gomes da Costa ‘Ma’Huno Bulerek Karathayano’. Imajen TATOLI/Eugénio Pereira

DILI, 26 setembru 2021 (TATOLI)–Prezidente Repúblika, Francisco Guterres ‘Lú Olo’ presta ona omenajen ikus Saudozu José Antonio Da Costa ‘Ma’Huno Bulerek Karathayano’ iha Muzeu Rezisténsia, kalan ne’e.

Nune’e mós, Prezidente Parlamentu Nasionál, Aniceto Guterres no inklui Governu no eis titular sira mós presta ona omenajen ikus ba Saudosu Ma’Huno.

Molok mate-isin entrega ba Estadu hodi halo seremónia funebre tuir ajenda Estadu nian, mate isin lori ona ba sede partidu Frente Revolusionária Timor-Leste Independente (FRETILIN) no Congresso Nacional de Reconstrução de Timorense (CNRT) hodi kuadru partidu sira presta omenajen ikus.

Notísia relevante: Xanana Gusmão: “ohin, ha’u lakon tan ha’u-nia Alin ida”

Tuir ajenda,mate-isin funu-na’in ne’e sei rai iha Muzeu Rezisténsia, hahú hosi loron 26 to’o 28 setembru hodi fó onra ba saudosu nia luta ba libertasaun nasionál no iha 28 setembru dadeer, sai hosi Muzeu Rezisténsia hodi ba Igreja Katedrál hodi halo Misa Réquiem.

Hafoin misa, Estadu entrega mate-isin ba família hodi halo seremónia kulturál iha Laleia, Manatuto, hafoin entrega ba Estadu atu kontinua halo seremónia funebre iha Metinaro.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here