Sidadaun na’in-tolu ne’ebé PNTL detein iha área mota Soilo, sábadu (25/09). Imajen/PNTL

BOBONARO, 26 setembru 2021 (TATOLI)–Polísia Nasionál Timor-Leste (PNTL) liuhosi patrullamentu konjunta hosi Kompaña Operasaun Espesiál (COE), Batallaun Orden Públika (BOP), inklui Unidade Patrulamentu Fronteira (UPF), detein timor-oan na’in-tolu, ne’ebé tenta hakat ilegál fronteira bá Belu, Nusa Tenggara Timur, Indonézia.

Komandante Unidade Espesiál Polísia (UEP), Superintendente Xefe Polísia Orlando, haktuir, timor-oan mane na’in-tolu ne’e, Polísia detein iha área mota Soilo, ne’ebé baliza ho suku Tapo-Memo no suku Saburai, postu administrativu Maliana, munisípiu Bobonaro iha sábadu (25/09).

“Suspeitu na’in-ualu, deskonfia atu bá foti karau iha Atambua, Indonézia hodi lori mai Timor-Leste, konsege detein de’it na’in-tolu inklui evidénsia hanesan tali ne’ebé uza atu lasu karau, enkuantu sira na’in-lima konsege halai,” Superintidente Xefe informa liuhosi nota ne’ebé Agência TATOLI asesu, domingu ne’e.

Notísia relevante: Semana tolu, PNTL detein ema na’in 153 hakat ilegál

Sidadaun hirak ne’e daudaun ne’e Polísia asegura hela iha Komandu PNTL munisípiu Bobonaro no sei entrega ba parte saúde hodi submete ba kuarentena durante loron 14, no kontinua ba prosesu investigasaun.

“Bainhira kazu ne’e rezista ona iha Ministériu Públiku (MP), PNTL hein mandadu kapturasaun hosi Tribunál, hodi kaptura sidadaun na’in-lima ne’e, tamba sira ne’ebé halai kompletu hotu ona ho evidénsia balun no agora ita sei prosesa tuir lei ne’ebé vigora iha nasaun,” Komandante UEP esplika.

Daudaun ne’e, membru BOP no COE ne’ebé destaka iha fronteira, apoia hela UPF hodi kontinua halo vijilánsia iha fronteira terrestre, ne’ebé konsidera sai fatin risku ba movimentu ilegál ba sasán kontra bandu sira, nune’e bele halo prevensaun no asegura fronteira sai fatin seguru ba ema hotu.

Antes ne’e, iha agostu nia laran, PNTL detein ema 153 ne’ebé hakat ilegál fronteira atu ba Atambua, Indonézia.

Jornalista : Sérgio da Cruz

Editora     : Julia Chatarina

HAKEREK NO HATÁN

Please enter your comment!
Please enter your name here