Unidade Patrullamentu Fronteira (UPF), detein timoroan na’in 21 iha aldeia Baer, suku Beseuk, postu administrativu Tilomar, munisípiu Covalima, tanba hala’o negósiu kuda ilegál, iha liña fronteira terrestre Indonézia ho Timor-Leste (TL), kuarta (18/08/21). Imajen PNTL.

DILI, 31 agostu 2021 (TATOLI)—Durante semana tolu hahú hosi 14 to’o 31 agostu tinan ne’e,  Polísia Nasionál Timor-Leste (PNTL), detein ema na’in 153 ne’ebé hakat ilegál hosi  fronteira terrestre ba  iha Nusa Tenggara Timur (NTT), Atambua, Indonézia no hosi Indonézia fila-mai Timor-Leste (TL).

Detensaun ne’e PNTL halo liuhosi operasaun konjunta, iha área fronteira munisípiu Bobonaro, Covalima no Rejiaun Administrativa Espesiál Oe-Cusse Ambeno (RAEOA).

Notísia relevante:UPM detein ema na’in-lima faan sigaru iha tasi

Tuir relatóriu polísia, iha sidadaun na’in-haat mak hala’o transaksaun sasán ho dalan ilegál no sira seluk nu’udár Grupu Arte Marsiál (GAM), ne’ebé ba tuir ezame iha Atambua.

Portavóz Komandu Jerál PNTL, Superintendente Xefe, Arnaldo Araújo, hateten sidadaun hirak-ne’e hetan detensaun bainhira hala’o movimentu atu ultrapasa ba Atambua no hosi Atambua atu tama fali TL ho dalan ilegál.

Hafoin polísia halo identifikasaun koordena kedan ho parte saúde no submete ba kuarentena durante loron 14 ba prevensaun COVID-19.

“Sidadaun hirak-ne’e balun sei iha kuarentena no balun sai ona, ita  prosesa tuir prosedimentu legál,” Arnaldo Araújo, hateten ba jornalista-sira liuhosi konferénsia imprensa iha kuartél jerál Komandu PNTL, Caicoli, tersa ne’e.

Iha loron 14 to’o 31 agostu rejista mós  timoroan 76 nu’udár membru GAM, ne’ebé autoridade seguransa no imigrasaun Indonézia deporta fila-fali mai TL, no antes ne’e mós autoridade Indonézia deporta membru GAM 500-resin.

Tuir dekretu Governu númeru 18/2021, 1 jullu kona-bá medida ezekusaun deklarasaun Estadu Emerjénsia, efetua hosi dekretu Prezidente Repúblika númeru 39/2021, juñu ne’e iha artigu 7, obrigatóriu kontrola sanitária, iha alinea 4 hateten, indivídiu ne’ebé tama-sai territóriu nasionál ho dalan ilegál sei heta koima ho valór mínimu $30 no másimu $250, maibé tenke kumpre uluk kuarentena durante loron 14, hafoin investiga no aplika multa.

Nune’e, sidadaun hirak-ne’e sei hetan sansaun multa no parte Serbisu Imigrasaun sei aplika no prosesu investigasaun kriminál parte polísia  submete ba Ministériu Públiku, hodi aprezenta ba Tribunál ba krime dezobediénsia.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here