Ministru Turizmu, Komérsiu no Indústria, José Lucas do Carmo da Silva. Imajen TATOLI/Francisco Sony

DILI, 26 setembru 2021 (TATOLI)–Ministériu Turizmu, Komérsiu no Indústria (MTKI) no parseiru daudaun ne’e kontinua halo preprasaun téknika uza materiál tais lokál hosi munisípiu 12 inklui Rejiaun Administrativa Espesiál Oé-cusse Ambeno (RAEOA) sai uniforme nasionál.

“Ekipa téknika sira aprezenta ona prosesu no preperasaun materiál tais nu’udar uniforme ba funsionáriu públiku no estudante sira, nune’e sei halo aprezentasaun iha reuniaun Konsellu Ministru atu halo apresiasaun no aprovasaun,” Ministru Turizmu, Komérsiu no Indústria, José Lucas do Carmo da Silva, hateten ba Agência TATOLI, foin lalais ne’e, iha Palásiu Governu.

Ekipa téknika kompostu hosi MTKI, Komisaun Funsaun Públiku (CFP, sigla portugés), Ministériu Edukasaun Juventude no Desportu (Ensinu Báziku no Ensinu Superiór), Sekretaria Estadu Arte Kultura (SEAK), Ministériu Argikultura no Peska (MAP), Ministériu Administrasaun Estatál (MAE), Gabinete Prezidente Repúblika, Gabinete Primeiru Ministru, UNESCO Antenna Office-Timor-Leste National Commission for UNESCO-TL, Timor Aid no Fundasaun Alola.

MTKI nu’udar instituisaun Governu ne’ebé inisia programa uniforme nasionál ne’e, tanba ne’e sei aprezenta ba ezekutivu sira kona-ba  rekomendasaun ekipa téknika.

Notísia relevante: Programa MTKI: tais lokál prodús uniforme ba funsionáriu públiku

Nune’e, Ministru José Lucas apresia ba ekipa ne’ebé envolve iha prosesu, hahú hosi estabelesimentu ekipa téknika, enkontru no diskusaun to’o toma konkluzaun hamutuk kona-ba formatu dezeñu ba funsionáriu públiku no estudante sira, maski seidauk iha aprovasaun legál hosi Konsellu Ministru.

Antes ne’e,  Diretor Nasionál Indústria Manufatureira, Egidio Guimaraes, husu Ministru atubele lori programa uniforme nasionál  ba reuniaun Konsellu Ministru.

Utiliza tais Timór ba uniforme nasionál fó biban hodi konsolida no promove nafatin identidade Timor-Leste nian tantu iha rai laran no ba mundu internasionál.

Aleinde ne’e, programa materiál tais sai nu’udar uniforme ofisiál, bele fó tulun no loke tan espasu ba kampu serbisu, liu-liu ba inan feton sira iha área rurál.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here