Ministru Turizmu, Komérsiu no Indústria, José Lucas do Carmo da Silva, bainhira halo entrevista esklusiva ho Agência Tatoli iha ninia knaar fatin, Mandarin, tersa (25/08). Imajen Tatoli/Joanico de Araújo

DILI, 25 agostu 2020 (TATOLI)–Ministru Turizmu Komérsiu Indústria, José Lucas do Carmo da Silva, hato’o ona proposta ba  Primeiru-Ministru, Taur Matan Ruak, atu  hola tais lokál hosi munisípiu 12 inklui Rejiaun Administrativa Espesiál Oé-cusse Ambeno (RAEOA), atu transfoma uniforme ba funsionáriu públiku atu uza iha kada institusaun Estadu.

Programa ne’ebé Ministériu Turizmu, Komérsiu no Indústria (MTKI) inisia no propoin maka tais lokál hosi ita-nia inan-feton sira prodús iha área rurál bele uza halo unifome ka farda ba ita-nia funsionáriu públiku hotu,” dehan  Ministru José Lucas, ba Agência Tatoli, iha ninia knaar fatin, Mandarin, tersa ne’e

Tuir Governante ne’e, programa ne’e ho intensaun atu  lori fila osan ba fali komunidade.

“Ha’u hanoin atividade ne’e atu lori fila osan ba komunidade, tanba ita lakohi osan sai no hakarak bele lori fila ba komunidade. Entaun propoin atu uza tais transforma ba matéria prima halo farda,” nia akresenta.

Nia nota katak, daudaun totál funsionáriu ka ajente Estadu hamutuk 44.000 , tanba ne’e maka MTKI planeia halo uniforme.

“Proposta ne’ebé ami hatama ba Primeiru-Ministru, husu atu konsidera tais hosi munisípiu hotu, téknikamente ami rekomenda ita tenke iha ekipa interministeriál ne’ebé bele toma nota ba kestaun ne’e no finansiamentu ami mós hanoin hela katak sei sentraliza iha Ministériu finansas,” nia informa.

Tuir Ministru, seidauk deside tais atu sosa ho folin hira maka tranforma ba uniforme, tanba sei presiza diskusaun ho parte relevante.

“Se tais ida suku ba uniforme ida maka ninia folin hetan $30 ba kada farda, ne’e katak sei presiza  osamentu pur volta $849.000, maibé depende ba negosiasaun ho kompañia ne’ebé atu halo,” dehan governante ne’e.

Kompañia ne’ebe sei hetan responsabilidade realiza programa ne’e sei iha diskusaun kle’an ho tékniku MTKI.

Ministru ne’e argumenta, atu transforma tais ba produtu uniforme funsionáriu sira atu uza iha kada instituisaun ne’e nu’udar promosaun ba produtu lokál.

“Ministeriu Turizmu, Komérsiu no Indústria  komesa promove ita-nia tais tanba ita lakohi tais ninia orijinalidade lakon tan de’it evolusaun no kompetisaun, tanba ne’e  ita hanesan nain presiza esforsu halo promosaun iha rai-laran,” nia subliña.

Enkuantu, promosaun tais ba rai-li’ur, iha ámbitu  MTKI tuir eventu internasionál maka sei halo promosaun.

“Ita partisipa feira internasionál antes ne’e hanesan Expo Turin no Expo Sanghai, no ita mós sei partisipa iha Expo Dubai,” nia akresenta.

Ministru dehan, iha oportunidade Expo Dubai maka iha oportunidade ba Timór atu lori produtu lokál ba mundu.

“Ita sei halo selesaun ba produtu ne’ebé iha valór boot hodi bele atrai investór sira no buka lori ba li’ur, iklui diversu tipu tais Timor-Leste ba Expo Dubai,” nia informa.

Kona-ba folin tais, Governu sei ko’alia iha nível interministeriál atu define folin loloos iha rai-laran no rai-li’ur.

“Ita presiza haree ba definisaun, ita sei haree ba folin tais , maibé sei ko’alia ho liña ministriál sira atubele haree no define folin tais loloos ka definitivu,” nia hatutan.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here