Prezidenti da Republika, Francisco Guterres Lu Olo.Imajen/Antonio Goncalves

DILI, 03 Marsu 2020 (TATOLI)–Komemorasaun Loron Nasionál Veteranu sira-nian iha loron 3 fulan Marsu, ninia abut mai husi, bainhira Kay Rala Xanana Gusmão ho Ma’Huno Bulerek Carathayano (Bucar) reorganiza Luta Libertasaun Nasionál iha territóriu tomak iha 3 Marsu 1981.

“Ohin ita selebra data istórika 3 Marsu 1981 dala ida tan, ne’ebé konsagra ona husi Estadu Timor-Leste liuhusi Lei Nú. 3/2016, nu’udár Loron Veteranu sira-nian. Data istórika ne’e liga ba Konferénsia Nasionál FRETILIN nian ne’ebé hala’o iha Maubai, Viqueque. Iha loron 3 Marsu, ho orientasaun husi membru CCF, sobrevivente rua, Xanana Gusmão no Ma’Huno, konfresista sira hili membru CCF na’in-sia foun tan hodi foti desizaun importante lubuk ida, hodi reorganiza ita-nia luta libertasaun nasionál iha territóriu tomak. Rezisténsia Armada moris filafali iha ai-laran. Povu hetan fali nia esperansa. Mundu hakfodak. Nune’e, ohin, ita selebra loron istóriku ida ne’e,” Prezidente Repúblika, Francisco Guterres “Lú Olo” esplika abut husi data istóriku ne’e liuhusi diskursu Komemorasaun Loron Nasionál Veteranu sira-nian iha Praça de Proclamação da Independéncia, Palásiu Governu, Dili, tersa ne’e.

Xefe Estadu fó hanoin, selebrasaun dahuluk Loron Veteranu akontese iha tinan 2017 ne’ebé prezide husi Prezidente Repúblika, Jenerál Taur Matan Ruak.

Ho selebrasaun tinan ida-ne’e nian, nia dehan, nia prezide datoluk ona ba loron boot ba Veteranu no Kombatente Libertasaun Nasionál hotu-hotu husi Frente Armada, Frente Klandestina no Frente Esterna ka Diplomátika, ba família sira, povu no nasaun tomak.

PR Lú Olo hatutan, semináriu halo iha iha loron horisehik ne’ebé  hala’o iha ámbitu programa selebrasaun Loron Veteranu tinan ida-ne’e nian, maluk sira ko’alia kona-ba “Memória 1974-1999 nian ba jerasaun ohin no aban bainrua nian”.

“Importante fó-hanoin kona-ba períodu 1974-1999. Ita-nia istória kona-ba luta libertasaun nasionál hahú husi 1974 ho inspirasaun husi ita-nia beiala sira-nia luta keta-katak hasoru kolonializmu portugés. No mós husi grupu nasionalista ki’ik ida-ne’ebé halibur subar-subar no hametin daudaun nasionalizmu ida-idak nian molok 25 abríl 1974,” aman nasaun ne’e fó hanoin.

Aleinde ne’e, nia hatutan, iha períodu husi 1975-1999 akontese violénsia, tortura, prátika jenosídiu no etnosídiu husi forsa okupasionista sira.

Maibé, nia informa, iha períodu hanesan mós timoroan hotu hametin liután no barani halo determinasaun atu funu nafatin to’o manán. Iha 1999 maka funu ramata no iha tinan 2002 mak Timor-Leste restaura independénsia ne’ebé proklama iha 28 novembru 1975.

“Ohin, loron veteranu sira-nian, ita haree símbolu oin-oin ne’ebé reprezenta oinsá ita organiza-an nu’udár kombatente nasionalista. Bandeira no símbolu sira-ne’e reprezenta forma organizasaun oin-oin iha períodu afirmasaun nasionalizmu no unidade nasionál,” nia hateten.

Istória ida-ne’e, nia haktuir, fó hanoin intervensaun husi FRETILIN, FALINTIL, nu’udár komponente polítika-partidária no armada iha luta libertasaun nasionál. Ida-ne’e, fó hanoin mós modelu foun organiza luta nu’udar Conselho Nacional da Resistênsia Nacional (CRRN).

“Órgaun nasionál supra-partidária harii iha 3 Marsu 1981 no nakfila ba CNRM (Conselho Nacional da Resistência Maubere). Iha 1988 no ikus mai nakfila ba CNRT (Conselho Nacional da Resistência Timorense). Iha 1998, ho partisipasaun husi organizasaun nasionalista hotu-hotu, inklui UDT, partidu polítiku ne’ebé harii iha 1974 ne’e,” xefe Estadu haktuir.

Inisiativa hatuur símbolu istóriku iha eventu ida-ne’e, Prezidente Repúblika hateten, ajuda mós reativa memória pasadu no transmite ba jerasaun joven no labarik sira, oinsá jerasaun luta-na’in sira organiza-an no organiza povu tomak to’o Referendu 1999.

“Referendu 1999 ne’e nu’udár aktu polítiku ida-ne’ebé povu Timor-Leste asume ho korajen atu hakotu funu ho timoroan hotu nia vitória ba Ukun Rasik-An,” nia dehan.

Notísia Relevante: Konsellu Veteranu Presiza Sede Própriu

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here