Vítima dezastre naturál iha Manleuana, tersa (07/09). Imajen TATOLI/Francisco Sony

DILI, 24 setembru 2021 (TATOLI)—Governu liuhosi reuniaun Konsellu Ministru (KM), halo analiza opsaun ba medida realojamentu komunidade ne’ebé afetada inundasaun iha loron 04 fulan-abríl.

Opsaun hirak ne’e aprezenta hosi Ministru Administrasaun Estatál (MAE), Miguel Pereira de Carvalho no Sekretáriu Estadu Protesaun Sivíl (SEPS), Joaquim José Gusmão dos Reis Martins.

“Ida-ne’e atu loke dalan iha meiu imediatu atu ajuda vítima sira liuliu kona-ba preokupasaun ba vítima hirak ne’ebé daudaun seidauk iha hela fatin. Konsellu Ministru sei analiza filafali opsaun sira ne’e no sei delibera iha sorumutuk tuirmai,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, sesta ne’e.

Hosi Ema na’in 15.876 ne’ebé uluk hela iha sentru akollamentu 57 ne’ebé eziste iha sidade Dili, ema 15.000 liu mak fila ona ba sira-nia hela fatin ka família sira.

Daudaun ne’e iha ema na’in 765 hosi uma-kain 137 maka sei hela iha sentru hitu ativu ne’e.

Notísia relevante: Governu verifika no ajuda vítima inundasaun muda ba fatin provizóriu

Antes ne’e, Sekretáriu Estadu Protesaun Sivil, Joaquim José Gusmão dos Reis Martins, hateten, daudaun ne’e Governu buka mekanizmu atu evakua vítima inundasaun iha loron 04 abríl hodi ajuda muda ba fatin provizóriu.

Esforsu dahuluk mak Governu sei halo nafatin mediasaun ho komunidade ne’ebé iha sentru akollimentu sira. Governu halo aproximasaun, bainhira vítima sira hakarak muda, Governu ba verifika no fasilita, enkuantu balun hakarak muda ba sira-nia fatin anteriór mós liña ministériu sira halo koordenasaun hodi verifika, nune’e prepara materiál konstrusaun, transporte no osan balun.

Razaun vítima dezastre naturál sei iha sentru akollimentu no moris iha tenda laran temporáriamente, tanba sira-nia uma la eziste no balun hela iha fatin risku dezastre hanesan iha mota ibun, foho lolon, ne’ebé risku ba rai halai, sobu uma no balun mota lori lakon uma.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here