Sekertáriadu Estadu Protesaun Sivíl (SEPS), Joaquim José Gusmão dos Reis Martins. Imajen TATOLI/Francisco Sony

DILI, 21 setembru 2021 (TATOLI)–Sekretáriu Estadu Protesaun Sivil, Joaquim José Gusmão dos Reis Martins, hateten, daudaun ne’e Governu buka mekanizmu atu evakua vítima inundasaun iha loron 04 abríl hodi ajuda muda ba fatin provizóriu.

“Esforsu dahuluk mak Governu sei halo nafatin mediasaun ho komunidade ne’ebé iha sentru akollimentu sira. Governu halo aproximasaun, kuandu vítima sira hakarak muda ba ne’ebé, bele muda, Governu ba verifika no fó ajuda, enkuantu balun hakarak muda ba sira-nia fatin anteriór mós liña ministériu sira halo koordenasaun bele verifika, nune’e prepara materiál konstrusaun, transporte no osan balun.

Daudaun ne’e, sentru akollimentu neen mak ativu, kompostu hosi salaun Dom Bosco, Manleuana, Hera, Metiaut, no seluk tan ho totál uma-kain 131, ne’ebé akumula membru família hamutuk 701.

Iha sentru akollimentu Manleuana iha família 11 mak prontu atu muda no iha Hera iha familía lima prontu muda balun ba família no balun ba munisípiu.

“Razaun sira sei iha sentru evakuasaun no moris iha tenda laran temporáriamente, tanba sira-nia uma la eziste no balun hela iha fatin risku dezastre hanesan iha mota ibun, foho lolon, ne’ebé risku ba rai halai, sobu uma no balun mota lori lakon hotu uma, tanba ne’e maka sira sei iha sentru evakuasaun,” nia akresenta.

Tanba ne’e, Primeiru-Ministru (PM), Taur Matan Ruak, orienta Ministériu Administrasaun Estatál (MAE) no Sekretaria Estadu Protesaun Sivil (SEPS) hodi rezolve vítima inundasaun ne’ebé to’o agora sei hela iha sentru evakuasaun.

“Primeiru-Ministru bolu ha’u ho Ministru Administrasaun Estatál mai up date tanba preokupa ho komunidade balun ne’ebé maka sei iha tenda maka presiza buka solusaun adekuadu ba sira. Primeiru-Ministru preokupadu tebes ho situasaun ne’e no bolu ami mai ko’alia asuntu ida-ne’e loos no fó instrusaun atubele deskute hodi rezolve lalais ona,” Sekretáriu Estadu hatutan.

Governu sei buka fali solusaun no tenke verifika didi’ak tanba bainhira Governu fó materiál ba vítima sira maka sira harii nafatin uma iha fatin hanesan, sei sai ameasa ba sira.

“Objetivu Governu maka asegura sira-nia vida no sasán, tanba ne’e maka karik filafali ba sira-nia fatin, tenke harii uma iha fatin ne’ebé mak livre hosi risku ba dezastre,” nia dehan.

Tuir Sekretáriu Estadu, alternativa ida maka hela iha kost, tanba Dekretu-Lei númeru 7/2021 ne’ebé foin aprova, iha mós espasu ba alojamentu hanesan kost.

“Ida-ne’e sai hanesan solusaun temporária ida ba vítima inundasaun sira,” nia subliña.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here